||
Wir burgermeister, der rat, die schepphen, die hantwerkmeister und die burger gemeinlich der stat zu Eger veriehen und tun kunt offenlich mit disem brive ||
allen den, di in sehen oder horen lesen, daz wir und di stat zu Eger mit dem lande und aller zugehorung von dem heyligen Romischen reiche, den ||
durchleuchtigen und den hochgeboren fürsten und herren seliger gedechtnüzz herren Otaker, herren Wentzlaw und herren Johans, etwenn kunigen zu Beheim, ||
iren erben und nachkomen kunigen zu Beheim umb etlich summe geldes zu rechtem pfande recht und redlich verseczet sein, daz uns allen on ||
zweifel kunt und wol wissentlich ist, und davon wann wir in disen zeiten an den allerdurchleuchtigsten fursten und unsern genedigen herren ||
herren KarI, Romischen kunig, zu allen zeiten merer dez reichs und kunig ze Beheim, noch seines vater tod kunig Johans seligen, unsers liben ||
herren, mit rechte komen sein, darumb haben wir dem obgenanten unserm herren, kunige KarI als einem kunig zu Beheim, seinen erben und nachkomen ||
kunigen zu Beheim mit wolbedachtem mut mit gantzem rat, mit rechter wissen und mit gutem willen für uns, unser erben und nachkommen ||
zu einem rechten pfande gehuldet, gelobt und gesworen, hulden, geloben und sweren mit guten, trewen on geverd, getrewe, gehorsam und ||
undertenig zu sein, als unserm rechten herren alleweg und alle stund on widerred und on all hindernuzze, untz an di zeit, daz uns daz reich ||
von im umb sulches gelt, als wir verseczet sein wider ledigt und lozet, und also daz uns, unser erben und nachkomen, die obgenanten ||
unser herren, kunige zu Beheim, der selben pfantschaft mit gutem willen umbetwungen loz und ledig sagen, mit urkund dicz briefes, versigelt ||
mit unser stat insigel, der geben ist zu Eger, do man zalt von Cristus geburt druczehenhundert jar, und dar nach in dem funfczigsten ||
jar dez nechsten donerstages vor dem heyligen pfingestag .