||
Wir Bolke von Gots gnaden herczoge in Slezien, herre von Furstinberk, czur Swydnicz unde czum Jawir, tun kund offenlich allen den, di diesen brif ansehen odir horen lezen, wann ||
der allirdurchluchtigist furste, unser genediger herre her Karl, romischer kunik, czu allen cziten des richs eyn merer unde kunik czu Behem, von sundirlichen synen kunglichen gnaden ||
uns das hus czum Czoboten zu unsern lebetagen ingeben unde vorliehen hat. In sulcher bescheidinheit sey das sache, das die durchluchtige furstinne unde frowe frowe Anna, romische||
kuniginne unde kuniginne zu Behem , unser liebe frowe unde mume, alzo stirbet, das sie eliche leibes erben mannes geslechte nicht leset, das wir denn dem obgnanten unserm herren ||
oder seinen erben kunigen zu Behem das selbe hus widerantworten sullen unde wollen. Were ouch das der obgenant unser herre sturbe ane erben, so sullen wir das obgenante hus wider ||
antworten dem hochgeboren fursten hern Johansen, margraven zu Merhern, synem brudir, odir wer do kunik zu Behem in czyten wurde, wer abir das wir leibes erben mannes geslechte ||
gewinnen, zo sullen wir die selben vesten dem obgenanten unserm herren, seynen erben, kunigen zu Behem, odir ob sie nicht weren, dem obgenanten margraven Johansen, seinem brudir, odir seinen ||
erben ingeben unde antworten an hindirnis vorgeczog unde an allis wedirsprechen. Dovon globen wir mit guten, steten, treuwen unde an alle geverde dem obgenanten unserm lie¬ ||
ben gnedigen herren unde seinem brudir dem obgenanten, das wir in unde iren erben unde nachkomen kunigen zu Behem unde margraven zu Merhern alle dy obgenanten gelubde von des ||
huzes wegen gancz stete unde unvorruckt haben unde halden wollen in alle der mazze, alz do vorbegriffen ist, unde des selben sol sich unser burggrave do selbist czuhancz mit zwein ||
seinen frunden vorbinden. Unde wir geloben in den obgenanten treuwen ane geverde, daz wir in nicht abeseczen noch vorkeren sullen noch wollen. Es sei denne, das wir eynen andirn ||
biderven man, do hen seczen, dor an dem obgenanten unserm herren, seinem brudir unde iren erben kunigen zu Behem billichen gnuge, unde das er sich von erste mit czwein synen frunden, allir ||
sulchir gelubde, alz do vorbeschriben ist, genczlichen habe vorbunden. Unde des haben wir unser ingesigel gehangen an disen brief unde den rat zur Swydnicz unde die nochgeschriben unser man ||
zu geczuge geben unde gebeten, alz sy do noch beschriben stehn unde wir ratlute der stat Swydnicz unde wir Kekel von Czirnen, Ulrich unde Reyntsch Schaff, gebrudir, Heynman unde ||
Steffan, gebrudir von Richenbach, Creczink von Czedlicz unde Cunrad von Czirnen, ritter Luppolt von Uchtericz, Cunad von Czedlicz unde Otte von Borsnicz bekennen offenlich, das ||
die obgenanten gelubde in unser gegenwortikeit getan unde geschehen sint. Mit urkunde dicz brifs, der vorsegilt ist mit unserm grosserm ingesegil unde unser manne, die in disem brive benant ||
sint. Gegeben czur Swydnicz an der nehesten mittewochen noch sante Petirs unde sante Pavyls tak, der heiligen czwelfboten, noch Gots geburte driczen hundirt jar unde in dem ||
drien unde fumfczegistim jare .