||
Wir der burgermeister, ratlute unde di burger gemeinlich der stat czu Rychenbach bekennen unde tun kunt offinllich mit desim brife allen den, di in sehen adir horen lesin, wann der hochgeborne furste und herre her ||
Bolke, herczoge von Slezien und herre czu Furstenberg, czur Swidnicz unde czu dem Jawor, unser lieber genediger herre, mit wolbedachtem mute unde mit rate seiner getruwen manne angeschen hat di besundere ||
fruntschaft unde liebe und ouch di sundirliche truwe, do mite er di allirdurchluchtigste furstinne unde frawe frawen Anna, romische kunginne, czu allen cziten mererinne des richs und kunginne czu Behem, etwenne seliger ge¬ ||
dechtnisse herczogen Heinrichis, unsers herren, sines brudir tochtir, unser genedge frawe, begriffen hat. Und van angeborner gute stetetlichen meinet und hat ir der obgenanten unser frawen und ires leibes erben beides geslechts, ||
di sie mit dem allirdurchluchtigstem fursten unde herren hern Karl, romischem kunge, czu allen cziten merer des richs und kunge czu Behem gewinnet, alle seine furstentum, herczogtum und herschefte czu der Swidnicz und ||
zu dem Jawor mit allen andern steten, festen und czugehorungen verschriben und vermache in alle der mazze, als in seiner furstenlichen brifen da nach begriffen und beschreben ist in semlichem luthe wir Bolke van Gots||
gnaden herczoge van Slezien, herre czu Furstenberg, czu der Swidnicz und czu dem Jawor bekennen unde tun kunt offinlich mit desin brife allen den, di in sehen adir horen lesen, das wir haben angeschen di sunderliche ||
gnade unde fruntliche gunst des allirdurchluchtigsten fursten unde heren hern Karls, romischen kungis, czu allen cziten merer des richs und kungis czu Behem, unsirs lieben genedigen herren, die her uns und unsern ge¬ ||
schlechte bewiset hat mit der konschaft, der geschehen ist czwischen em an eyme teil unde der durchluchtigen furstinne frawen Annen, der romischen kunginne und kunginne zu Behem, unsir lieben frawen und mumen, etwenne ||
hertzogen Heinrichs, seligen unsirs brudir tochtir an dem andern, unde darumb geben machen und verschriben wir der obgenante unsir lieben frawen und mumen, als einer kunginne czu Behem und eres leibes erben, di sie mit dem ||
obgenanten unsirm heren dem kunge haben wirdet, unser herczogetum, furstentum und herschaft czu der Swidnicz und czu dem Jawor mit den stetten Swidnicz, Stregom, Hayn, Landishute, Ruchenbach, Nympcz, Jawor, Laweinberg, ||
Hirsperg, Bunczlau und Czoboten mit den festen und merkten Griffinstein, Griffinberg, Len, Schonov, Kliczchdorf, Hornsperg und Kinsperg mit alle mannen, manschaften, lehen, lenhenscheften, verlehenten guten, gerichten, czol¬ ||
len, muntczen, cinden, gulden, kreizzen, wichpilden, kirchlehen, pfrimden und Gots gaben, welden, puschen, bergen, slichten, wazzern, wazzirslouften, molen, wesin, weiden, geieyde, vogilweide, rechten, nuczten, gewonheiten ||
und allen czugehorungen, wi man di gennenen mag, mit sunderlichen worten, nichtiznicht uszunemen in allir der mazze, als wir is yczunt haben, und her nach mit rechte czu uns brengen mochten. In sulchir bescheidenheit, sei das ||
sache, das wir van Gots verhenknisse also verscheiden, das wir eliche leibes erben mannes geslechte hinder uns nicht lazsen, das dann di obgnante unsir genedige frawe und liebe mume und ires leibes erben, di sie mit unsirm her¬ ||
ren dem kunge haben wirdt, als do vor geschrieben stet, di selben unsere herczogetum, furstentum, herschefte, lant, luthe und aller andir czugehorunge, als do vor beschrieben ist, erben und besiczen sal genczlichen, ungehindert unde do ||
mite tun und laszen nach freir willekur, als mit irem rechten erbe unschedelich, doch der hochgebornn furstinne frawen Agnisen, unsir elichen wirtinne in irme liebgedinge, wenn si alle di vorgenante furstentum, lant und herschefte ||
mit allen nuczten haben und besiczten sal nur czu iren lebtagen. Were abir, das wir mit gnaden Gots eliche leibes erben mannes geslechte gewunnen, so sullen di selben unsir erben der obgenanten unsir frawen und mumen und ires leibes ||
erben, ab sie nicht were, czehentusent schog grazzir pfenninge pregischer munczte mit gereitem gelde berichten und bezahlen. Adir festen Lewinberg und Bunczlaw mit iren wichpilden, festen, rechten, nuczten und zugehorunge ||
czu rechten pfande seczten, als lange uncz, das sie di obgenanten czehentusent schog genczlich berichten und beczalen. Unde da mite sullen denne di selben unsir erben bei den vorgenante unsern furstentum, herscheften und landen unge¬ ||
hindert bleiben. Were ouch, das wir eliche leibes erben mannes geslechte nicht hetten, und doch tochtir liezzen, so sullen di obgenanten unsir liebe genedige frawe adir ires leibes erben, di si mit unsirm heren dem kunge gewinnet, ytlicher ||
unsir tochtir czehentusent schog grozzer pfenninge geben und si bestaten noch rechtir gewohnheit als geborner fursten kinder. Ouch haben wir gelobt und geteidinget, sei das sache, das di obgenante unsir eliche wirtinne unsirn tot ||
gelebte, das si danne nach der czit unsirs todis keynen burggraven, pfleger adir amptman auf festen, husern, in steten adir in landen verkeren adir verwandiln, sal es si danne, das sie einen bedirman, der do glich gut und gewizz ||
sei, dem ersten an sein stat seczte, an dem der obgenanten unsir frawen adir iren erben moge billich genugen, unde das der selbe czu vor sich aller gelubde, eyde und truwen verbunden habe. Der obgennante unsir frawen der kunginne adir iren ||
erben, gelich seinem vorfaren an des stat hergesecztet wirdet. Were ouch, das di obgennante unsir genedige frawe und liebe mume wartende des obgenanten annevalles e, wanne sie in gewer queme, also sturbe, das si leibes erben mit dem ||
obgennante unsirm heren nicht gewinne, so sullen alle man, ritter, knechte, burggraven, burger und alle lantfezzen, allir der obgenannten eyde und gelubde ledig sein, doch insulcher bescheidenheit, das dem obgennanten unsirm heren dem ||
kunge und seinen erben das obgenante egelt und heinnsteur, der obgenanten czehentusent schog gevallen sal, adir mit pfande gesichirt wenden, in alle der mazse, als do vor begriffin ist, das sy do mite tun und lazsen nach ||
freir willekur. Unde das geben, wenn si wollen. Were ouch, das di obgenante unsir genedige frawe und liebe mume den obgenanten unsirn heren den kunig obirlebte unde eynen andirn man neme an unsern dank ||
unde willen, so sullen beide si und der man und alle kint, di sy mi em gewinnet, in den obgenanten unsir furstentum und herscheften nichtes haben. Ouch ist gereth und geteidingt, das di obgenante unsir frawe di kun¬ ||
ginne und unsir liebe mume, noch ymand van iren wegen uns, unsir erben mannes geslechte umb keynirlei erbeteil adir umb keine adir sache anreden adir ansprechen sullen, andirs wenn do vor geschriben ist. Ouch ||
meynen und wollen wir, sei das sache, das uns chaftege not antreten wirdet umb gefengnisse, kriek adir andir geschichte, unsir adir unsir manne, ere adir liep czu lozsen, das wir denn der selben unsir furstentum, ||
lant und lute gewaldig sein, czu tun und czu lazsen, doch in guten trewen und an alle geverde vor noch sint dem mal, das uns der obgenante genedig herre mit sulchen synen gnaden gunstlich und fruntlich begrif ||
sein hat. So geloben und wollen wir im mit guten truwen an geverde beistendig und behulfin sin wedir allirmenneglich, nimande usczumemen und in mymmir undir wegen czu lozsen mit liebe noch mit gute. Und alle seine ||
viende sullen unsir viende sin. Und meynen und wollen ouch keyne sine wedirsachen adir viende cristen, juden adir heyden in unsern landen, husen, hofen, halden adir vorteidingen, di wedir das recht sin, und recht nicht ||
tun wollen. Di gunnen wir im und synen amptluten, das si di selben angriffin und rechtvertigen sullen und mogen, wo si der bekomen in alle unsern herscheften und landen. Mit urkunde dizz brifes versegilt mit un¬ ||
sirm grozsen ingesigil, der gegeben ist czu der Swidnicz nach Crists geburt dricenhundirt in dem dryumdfumfzigsten jare an der nesten mitwoche noch sente Petir und Pauwils tage, der heiligen czwelfboten. Do van ||
durch sunderlichen gebot des obgenanten fursten und heren herczoge Bolken, unsirs lieben genedigen heren, der uns das geboten und geheisen hat, mit lewendir stymme und in offinbar kegenwortikeit syner edlen getriwen ||
manne, so haben wir mit wolbedochtem mute, mit worte, gunft, wissen und willen der ganczen gemeynschaft, allir unsir miteburg der obgenanten allirdurchtigsten furstinne der romischen kunginne und czu Behem frawe||
Annan , unsir genedigen frawen und iren leibes erben, di si mit dem obgenanten fursten und heren kunig Karl, wem elichen wirthe gewinnet, gehuldit, gelobt und gesworn, hulden, geloben und swern, das wir, wenn is czu sulchen schulden ko¬ ||
met, als do vor geschriben stet in unsirs heren herczoge Bolken brife, ir und den selben ires leibes erben, wenn si mit hulfe Gots di gewinnet, getruwe gehorsam wartende und undirtenig sin wollen als unsir naturlichir und angebor¬ ||
ner herschaft in allen den punkten, meynnuge und artikiln und in allir der mazze, als des obgenanten unsirs heren herczog Bolken brife sprechen, usgenomen doch den artikil, der czu dem leisten in dem selben brife stet umb di hulfe, ||
di beide der obgenante kunig Karl und ouch unsir herre herczoge Bolke, ein andir tuhen und leisten sullen, wann uns di selben gelubde nicht anegen, und czu den andern unsern sachen, dorauf wir gehuldit und gesworn haben nicht geho¬ ||
ret. Mit urkunde dis brifes, versegilt mit unsir stat ingesigil, der gegebin ist czu der Swidnicz nach Crists geburt driczenhundirt, unde dar noch in dem dryunfunfczigsten jare des nehsten samstages nach sente Petirs unde||
Pauwils tage der heiligen czwelfboten .