||
Wir der burgermeister, ratlute und di burger gemeinlich der stat czu Lewinberg, bekennen und tun kunt offenlich mit desim brife allen den, di in sehen adir horen lesen, wann der hochgeborne furste und herre her ||
Bolke, herczoge von Slezien und herre an Furstenberg, zur Swidnicz und zu dem Jawor, unsir lieber genediger herre, mit wolbedachtem mute und mit rate seinir getruwen manne angeschen hat di besundere fruntschaft ||
und liebe und ouch di simdirliche truwe, do mite er di allirdurchluchtigste furstinne unde frawe frawen Anna, romische kungine, zu allen cziten mererinne des richs und kuniginne czu Behemn, etwenne seliger ge¬ ||
dechtnisse herczogen Heinrichis, unsirs heren, seines brudir tochtir, unser genedige frawe, begriffen hat und von angeborner gute steticlichen meinet und hat ir der obgenanten unser frawen und ires leibes erben ||
beydis geslechte, di sie mit dem allirdurchluchtigstem fursten und herren hern Karl, romischem kunge, czu allen cziten merer des reichs und kunge ze Behemn, gewinnet, alle seine furstentum, herczogtum und her¬ ||
schefte zu der Swidnicz und zu dem Jawor mit allen andern steten, vesten und czugehorungen verschriben und vermacht, in aller der mazze, als in seinen furstenlichen brifen da nach begriffen ist in semlichem lute. Wir ||
Bolke von Gots gnaden herczoge von Slezien, herre zu Furstenberg, zu der Swidnicz und czu dem Jawor, bekennen und tuen kunt offenlich mit desem brife allen den, di in sehen adir horen lezen, das wir haben angeschen die ||
sundirliche gnade und fruntliche gunst des allirdurchluchtigsten fursten und herren hern Karls, romischen kungis, ze allen zeiten merer des reichs und kungis ze Behemn, unsirs lieben gnedigen herren, di er uns und ||
unsirn geslechte bewiset hat, mit der konschaft, di geschehen ist zwischen im an einem teil und der durchluchtigen furstinne frawen Annen, der romischen kunigine und kunigin ze Behem, unsir lieben frawen und mu¬ ||
men, etwenn herczogen Heinrichs, seligen unsirs brudir tochter, an dem andern, und darumb geben machen und verschriben wir der obgenante unsir lieben frawen und mumen als einir kunginne zu Behem und ||
ires leibes erben, di sie mit dem obgenanten unsirm herren dem kunige haben wirdet unsir herczogetum, furstentum und herschaft zu der Swidnicz und zu dem Jawor mit den steten Swidnicz, Strygon, Hayn, Lan¬ ||
dishute, Richmbach, Nympcz, Jawor, Lewemberg, Hirsperg, Bunczlaw und Czoboten mit den festen und merkten Greifenstein, Greifinberg, Len, Schonov, Klitschdorf, Hornsperg, und Kynsberg mit allen mannen, ||
manscheften, lehen, lehenscheften, verlehenten guten, gerichten, czollen, munczen, cinsen, gulden krezen, wichpilden, kirchlehen, pfrinden und Gots gaben, welden, puschen, bergen, slichten, wazzern, wazze¬ ||
louften, molen, wysin, weidin geieyde, vogilweide, richten, nuczczen, gewonheiten und allen czugehorungen, wi man di genennen mag, mit sunderlichen worten, nichtiznicht auzgenemen in alln der ||
mazze, alz wir is yczunt haben und her noch mit rechte czu uns brengin mochten zu sulchir bescheidenheit, bei daz sache, daz wir von Gots verhenknizze also verscheidin, daz wir eliche leibes erben, mannes, ||
geslechte, hinder uns nicht lazen, daz dann di obgnante unsir genedige frawe und liebe mume und ires leibes erben, die sie mit unsirm herren dem kunge haben wirdet, alz do vor geschriben stet, die sel¬ ||
ben unsere herczogeum, furstentum, herschefte, lant, lute und allir andir czugehorunge, als do vor beschriben ist. Erben und besiczczen sal genczlichen ungehindirt und do mite tuen und lazen, noch freir willekur ||
als mit irem rechten erbe unschedlich, doch der hochgebornn furstinne frawen Agnisen, unsir elichen wirtinne, in irme leibgedinge, wenn sie alle die vorgenante furstetum, lant, herscheffte mit allen nucz¬ ||
czen haben und besiczczen sal, nur czu iren lebtigen were abir, daz wir mit gnaden Gots eliche leibes erben mannes geslechte gewunnen. So sullen di selben unsir erben der obgenanten unsir frawen und mumen und ||
ires leibes erben, ob sie nicht were, czehen tusent schog grozzir pfennige pregischer muncze mit gereitem gelde berichten und bezalen, adir die vesten Lewemberg und Bunczlaw mit iren wichpilden, vesten, ||
rechten, nuczczen und zugehorunge czu rechtem pfande seczczen als lange uncz, daz sie die obgenanten czehentusent schog genczlich berichten und beczalen, und da mite sullen denne diselben unsir erben bei den vorgenanten ||
unsern furstentum, herscheften und landen ungehindirt bleiben. Were ouch, daz wir eliche leibes erben mannes geslechte nicht hetten und doch tochter liezzen, so sullen di obgenanten unsir genedige frawe adir ||
ires leibes erben, di sie mit unsirm herren dem konige gewinnet, ytlicher unsir tochtir czehentusent schog grozer pfennige geben und sie bestaten noch rechter gewonheit als gebornen fursten kinder. Ouch haben ||
wir gelobt und geteidinget bei daz sache, daz di obgenante unsir eliche wirtinne unsirn tot gelebte, daz sie danne noch der czit unsirs todis keinen burggraven, pfleger adir amptman uff vesten, husern in ||
steten adir in landen verkeren adir wechseln sal, ez sie danne, daz sie einen bedirman, der do glich gut und gewizz sei, dem ersten an sein stat seczcze an dem der obgenanten unsir frawen adir iren erben moge ||
billich genugen, und daz der selbe zu vor sich allir gelubde, eyde und truwen verbinden habe, der obgennante unsir frawen der kunginne adir iren erben, gelich seinem vorfaren an des stat er geseczczet wirdet. ||
Were ouch, daz di obgennante unsir gnedige frawe und liebe mume, wartende des obgenanten anevalles ee, wanne sie in gewer queme also sturbe, das sie leibes erben mit dem obgennante unsirn herren nicht gewinne, ||
so sullen alle man, rittir, knechte, burggraven, burger und alle lantsezzen, allir der obgenannten eyde und gelubde ledig sein. Doch in sulchir bescheidinheit, das dem obgennanten unserm herren dem kunige und ||
seinen erben, daz obgenante egelt und heymsteur der obgenanten czehentusent schog gevallen sal adir mit pfande gesichirt werden in allir der mazze, als do vor begriffen ist, daz sie da mite tuen und lazen noch freyr ||
willekur, und daz gebin wem sie wellen. Were ouch das di obgenante unsir frawe unde liebe mume den obgenanten unsirn herren den kung obirlebte und einen andirn man neme an unsirn dang und ||
willen, so sullen beide sie, der man und alle kint, die sie mit in gewinnet, in den obgenanten unsir furstentum und herscheften nichtes haben. Ouch ist gerecht und geteidingt, daz di obgenante unsir frawe di kuniginne ||
und unsir liebe mume noch ymand von iren wegen uns und unsir erben mannes geslechte umb keinirlei erbeteil adir umb keine andir sache anreden adir ansprechen sullen, andirs wenn do vor geschri¬ ||
ben ist. Ouch meinen und wellen wier, sey daz sache, das uns chaftige not antreten wirdit umb gevengnisse, krieg adir andir geschichte unsir adir unsir manne, ere und lerp czolozen, daz wir denn der ||
selben unsir furstentum, lant und leute gewaldig sein, zu tuen und zu lazen, doch in guten truwen und an alle geverde. Dornoch seint dem mal, daz uns der obgenante genedigen herre mit sulchen seinen gnaden ||
gunstlich und fruntlich begriffen hat, so geloben und wellen wir im mit guten truwen an geverde beigestendig und beholfen sein wedir allirmenlichen, nyemand auczczenemen und in nymmer undiwegen zulazen ||
mit leibe noch mit gute. Und alle seine viende sullen unsir viende sein. Und meinen und wellen ouch keine seine wedirsachen adir vinde, cristen, juden adir heiden in unsirn landen huczen, hofen, halden adir vertey¬ ||
dingen, di widir daz recht sein und nicht tuen wellen, di gunnen wir im und seinen amptluten, daz sie die selben angreiffen und rechtnertigen sullen und mögen, wo sie der bekomen in allen unsirn herschef¬ ||
ten unde landen. Mit urkund dizz briefes, versigile mit unsirm grozzen ingesigel, der gegeben ist czu der Swidnicz noch Crist geburd dreiczenhundirt in dem dreiundfunfzigstem jare an der nehsten mitewoche ||
noch santhe Petirs und Pawils tage, der heiligen czwelfboten. Da von durch sundirlicher gebot den obgenanten fursten und herren herczoge Bolken, unsirs lieben genedigen herren, der uns das geboten und geherzen ||
hat mit lewendir stimme und in offinbar gegenwertikeit sein edlen getriwen manne. So haben wir mit wolbedachten mute mit worte gunst wissen und willen der ganczen gemeinschaft, allir unsir mite¬ ||
burger der obgenanten allirdurchluchtigsten furstinne, der romischen kunge und ze Behem frawen Annan, unsir genedigen frawen, und iren liebes erben, di se mit dem obgenanten fursten und herren kung Karl, wem elichem ||
wirte gewinnet, gehuldit, gelobt und gesworn, hulden, globin und swern, daz wir, wenn is zu sulchen schulden komet, als dovor geschriben stet in unsirs heren herczog Bolken brife, ir und den selben iren ||
leibes erben, wenn sie die mit hilfe Gots gewinnet, getruwe, gehorsam wartende und undirtenig sein wellen, als unsir naturlichir und angeborner herschaft in allen den punkten, meinungen und artikiln ||
und in allir der maze, als di obgenanten unsirs herren herczog Bolken brife sprechen, us genommen doch den artikil, der zu dem leisten in dem selben brife stet umb die hulfe, die der obgenante kunig Karl unde ouch ||
unsir herre herczoge Bolke ein andir tun und leisten sullen, wann uns diselben gelubde nicht anegen und zu den andirn unsern sachen. Dor uff wir gehuldit und gesworn haben nicht gehoret. Mit urkunde ||
diczz briefs, versigilt mit inser stat ingesigil, der gegebin ist zu der Swidnicz noch Crists geburd dreiczenhundirt und do noch in dem dreiundfumfczigsten jare des nehsten dunrstages noch sante Petirs||
und Pawils tage, der heiligen czwelfboten .