||
Wir rotleute unde dy beurger gemeynlich czur Landishute der stait bekennen unde thun kunt offintlich mit dezim brife allen den, dy en sehen adir horen lezin, wan der hochgeborne furste und herre her Bolke herczoge von Slezien und||
herre czu Furstenberg, czur Swidnicz unde czu dem Jawor , unser lieber genediger herre, mit wolbedachtem mute, mit gutym willen unde mit rate seiner getruwen manne angeschen hat di besundere fruntschaft unde liebe und ||
und ouch di sundirliche truwe, do mete her di allirdurchluchtigste furstinne unde frawe frawen Anna, romische kunginne czu allen czeiten mererinn des richs und kunginne czu Behem, etwenn seliger gedechtniss herczogen Heinrichis, unsers heren, ||
sines brudir tochtir, unser genedge vrouwe begriffen hat und von angeborner gute stetetlichen meynit und hat ir der obgenanten unser vrowen und ires leibes erben beides geslechts, di sie mit dem allirdurchluchtigstem fursten unde heren ||
hern Karl, romischem kunge, czu allen cziten merer des richs und kunge czu Behem, gewinnet, alle seine furstentum, herczogtum, herschefte czur Swidnicz und zu dem Jawor mit allen andern steten, vesten und czugehorungen verschriben und vermacht ||
in alle der mazze, als in seiner furstenlichen brifen, da nach begriffen ist in semlichem luthe. Wir Bolke von Gotis gnaden herczoge von Slezien, herre von Furstenberg, czur Swidnicz und czu dem Jawor, bekennen unde tun und kunt offinlich mit ||
desin brife allen den, dez in sehen adir horen lesen, das wir haben angeschen di sunderliche gnade unde fruntliche gevust dez allirdurchdirluchtegsten fursten unde herren hern Karls, romischen kunegs, czu allen cziten merer des richis||
unde kungis czu Behem , unsirs lieben genedigen herren, die her uns unde unsern geschlechte bewiset hat mit der koschaft, dy geschehen ist czwischen ym an eyme teile unde der durchluchtigen furstinne vrowen Annen, der romischen||
kuneginn und kuneginn zu Behem , unsir lieben frawen und mumen, etwen herczogen Heinrichs, selygen unsirs brudir tochtir, an dem andern, unde dar umb geben machen und verschrieben wir der obgenante unsir lieben frawen und mumen ||
als einer kunginn czu Behem unde eris leibis erbin, di sie mit dem obgenanten unsirm heren dem kunge haben wirdet unser herczogetum, furstintum und herschefte czur Swidnicz und czu dem Jawir mit den stetten Swidnicz, Stregom, ||
Hayn, Richinbach, Nympcz, Landishut, Jawir, Lemberg, Hirsberg, Bonczlau und Czobotyn mit den vestin unde merkthin Griffinsteyn, Griffinberg, Len, Schonov, Kliczdorf, Hornsberg und Kinsberg mit alle den mannen, manscheftin ||
leyn, lenscheftin, vorlentyn gute, gerichten, czollin, munczin, cinzin, geuldin, kreyzzen, witbildin, kirchlehyn, pfrundin unde Gots gabyn, weldin, puschin, bergin, slichtyn, wazzern, wassirleuftin, molen, wezin, weyden, geiey¬ ||
de, vogilweyde, rechtyn, nuczyn, gewohnheyten und allyn czugehorungyn, wy man dy bennenyn mak mit sundirlichin wortin, nichttisnicht uzczunemyn, in alle der maze, als wirs yczunt habin, und hernoch mit rechte czu uns ||
brengin mogin in sulchir bescheydinheyt, sie daz sache, das wir von Gotis vorhengnis, alzo vor scheydin, daz wir eliche libes erbyn mannis geslechte hindir unz nicht lazen, daz denne dy obgenante unzir gnedege vrouwe ||
und lybe mume und eris libes erben, dy sy mit unsirm herren dem kunge habin wirdet, alzo do vor geschrebin steit, dy selbin unsir herczogtum, furstintum, herschefte, lantleute und alle andir czuhorunge, als do vor ||
begriffin ist, erben und besiczczin sal genczlichen ungehindirt und do mit thun und lazen noch vrey willekor, als mit erim rechtin, erbe unschedlich der hochgeborn furstynyn frawen Angnezin, unsir elichin wirtinnen ||
in erin lipgedinge, wenne si allis di obgenante furstintum, lant und herschefte, mit allim nuczcze habyn und besiczczin sal nur czu erin lebetagin. Wen abir, daz wir mit gnadin Gotis eliche libes erben mannis ge¬ ||
slechte gewunnen, zo sullin di selbin unsir erben, der obgenanten frawen und mumyn adir erin libes erbyn, ab sy nicht were, czehyn thusunt schog grozir pfenningge pregischer muncze mit gereytim gelde, berichtin und ||
beczalen adir dy vestin Lemberg und Bonczlov mit witbilden, vestin, rechtyn, nuczyn und zugehorungyn czu rechtin pfande seczin, alzo lange uncz, daz si di obgenanten czeyn thusunt schok genczlichin berichtin ||
und beczalen, und do mete sullin, denne dy selbyn unsir erben by den vorbenanten unser furstyntum, herscheftyn unde landyn ungehindirt bliben. Weir abir ab weliche libes erben mannis geslechte nicht hetten ||
und doch tochtir lyzen, zo sullin dy obgenanten unsir lybe gnedege frawe adir eris leibis erben, dy sy mit unsirm herren dem kunge gewinnet, iczlichir unsir tochtir czeyn thusunt schok grozir pfenningge ||
gebyn und sy bestatyn noch rechtir gewonheyt als geborn furstyn kindir. Auch habe wir gelobit und gethedingt, sye daz sache, daz dy obgenante unser eliche wirttinne unsirn tot gelebete, daz sy dan noch der ||
czit unsirs todis keynen burggraven, pfleger adir amptman uf vesten, heusirn, in stetyn adir in landin, so keyn andirn adir wechsiln, sol es sye dan, daz sy eynen bedirman, der do glich gut unde gewiz, sy dem ers¬ ||
tin an syn stait seczcze an dem der obgenanten unser vrawen adir erin erben moge billichin genugin, und daz der selbe czu vor sich allis geleubdis, eyden unde treuwen vorbundin habe, der obgennante unser frawyn der ||
kungynen odir erin erbin, glich synem vorvarin an dez stat her gesaczt wirt. Weir auch daz dy obgennante unsir gnedege vrouwe und liebe mume wartinde des an vallis ewen sy ingeweir queme alzo sturbe, ||
daz sy libes erbyn mit dem obgennanten unsirm herren nicht gewunne, so sullin alle man, rittir, knechte, burggrave, burger unde alle lantzesin allir der obgenanten eyden und geleubde ledik sin, doch in sulchir ||
bescheydinheit, daz dem obgenantin unsirm herren dem kunige und synen erbin daz obgenante egelt und heymsteuwir der obgenanten czeyn thusunt schok gevallin sal, odir mit pfandin gesichirt werden in allir ||
der maze, als do vor begriffin ist, daz sy do mete thun und lozin noch vrier willekeur, und daz gebin weme sy wellin. Weir abir daz d obgenante unser vrouwe und mume den obgenanten unsirn herren den ||
kunig obirlebete und eynen andirn man neme an unsirn dank und willen, so sullin beyde sy und der man und alle kint, dy sy mit ym gewinnit, in den obgenanten unsirm furstintume und herscheftyn ||
nichttisnicht habyn. Ouch ist geret und gethedingt, daz dy obgenante unsir vrouwe, dy kunegyne und unsir lybe mume noch ymant von iren wegin uns und unsir erbin mannis geslechte umb keynirleye er¬ ||
beteil adir umb keyne andir sache anredin odir ansprechin sullin, andirs wen do vor beschrebin ist. Ouch meyne und wolle wir sy daz sache, daz uns chaftege not antretyn werdin umb gevencisse, ||
krik odir andir geschicht unsir odir unsir mame, ere und lip czu lozin, daz wir denn der selbin unsir furstyntum, lant und leute gewaldik sin czu thun und czu lazzyn, doch in guten treuwen und an all ||
geverde dor noch und sint dem mol, daz uns der obgenante unsir gnedegir herre mit sulchin syenen gnadin, gunstklich und fruntlich begriffin hat, zo globe und wolle wir ym mit guten treuwen ||
an geverde bystendik sin und beholsin wedir allirmenlich, nymant uzczunemyn und yn nymir undirwegyn czu lazin mit leybe noch mit gute. Und alle seyne vinde sullin unzir vinde sin ||
und meynen und wollin keyne sine wedirsachin odir vinde cristen, juden, heydin in unsirn landin huzin hofen noch haldin odir vorthedingin, dy wedir daz recht sin und nicht recht thun wol¬ ||
len, dy gunne wir ym und sinen amptleuten, daz si di selbin angrifen und rechtvertegin sullen und mogen, wo sy der bekommyn in allen unsirn herscheftin unde landin. Mit orkunde diz brifis vor¬ ||
zegilt mit unsirm grozin ingezegil, der gegebin ist czur Swidnicz noch Cristis geburt driczenhundirt jar in dem driundvunfczegistin jar an der neistyn metewochin noch sente Petirs und Pav¬ ||
ils tage, der heyligin czwelfboten. Do von durch sundirlich gebot des obgenanten furstin und herren herczogin Bolkin, unsirs lyben gnedegin herren, der uns daz gebotyn und geheyzin hat mit lebin¬ ||
dir stimme und in offinbarkeygywortekeit siner edilen getreuwen manne, zo habe wir mit wolbedochtim mute, mit worte, gunst, wissen und willen der ganczin gemeynschaft, allir unzir metebeur¬ ||
ger der obgenanten allirdurchirluchtygsten furstyn, der romisschyn kunegyn und kunegin czu Behym, vrouwen Annan, unsir gnedegin vrouwen, und erin leibis erbin, dy sy mit dem obgenanten furstyn und herren ||
kunig Karl, erim elichin wirte gewinnit, gehuldit und gelobt unde gesworen, huldin, gelobin und swern, daz wir wen iz czu sulchin schuldin kumpt, alzo do vor geschrebyn steit in unsirs her¬ ||
ren herczogin Bolkin brifen ir und den eris leibis erbin, wenne sy dy mit heulfe Gotis gewinnet, getrewe, gehorsam, wartinde syn wellin und sullin, alz unsir naturlichir und angebornir herschafte ||
in allin den puncten, meynungyn und artikiln, und in alle der maze, alz dy obgenanten unsirs herren bryfe herczoge Bolkin sprechin, auzgenomyn uz den artikiln, der czu dem lecztin in den selbin brife steit ||
umb dy hulfe, dy beyde der obgenante kunig Karl und ouch unsir herre herczog Bolke in andir thun und leistin sullin, wenn uns di selbin geleubde nicht angen, und czu den andirn unsirn sachin dar¬ ||
uf wir gelobit und gesword habin nicht gehoret. Mit orkunde dis brifis, vorzegilt mit unzirn ingezegil, der gegebin ist czur Swidenicz noch Cristis geburt driczenhundirt jar in dem dry und||
vunczegistyn jar an dem neistyn dunrstage noch Petirs und Pavils tage, der heyligin czwelfboten .