||
Wir burgermeystir und ratlute und dy burger gemeynlich der stat czum Len bekennen und tun kunt offentlich mit desem brife allen den, dy yn sehen odir horen lesyn, wann der ||
hochgebornn furste und herre her Bolke, herczog von Slezien und herre czu Frostenberg, czur Swidnicz und czu dem Jawor, unsir lyeber genediger herre, mit wolbedachtym mute, ||
mit gutem willen und myt rate syner getruen manne angesehen hat di besundir vrunschaft und liebe, und ouch dy sundirliche truwe, do mite her di allirdurchluchtigste ||
furstinne und frawe frawen Anna, romischen kuneginne, czu allen cziten mererinne des riches und kuneginne czu Behem, etwenn seliger gedechtnizze herczogen Heinrichs, unsirs ||
herren, sines brudir tochtir, unsir genedige frawe begriffen hat. Und von angebornir gute stetetlichen meinit und hat ir der obgenanten unsir frawen und eris libes erben beydes geslech¬ ||
ts, die sie mit dem allirdurchluchtigsten fursten und herren hern Karln, romischem kunge, czu allin cziten merer des riches und kung czu Behem, gewinnit. Alle sine furs¬ ||
tentum, herczogtum und herschefte czu der Swidnicz und czu dem Jawor mit allen den andern steten, vesten und czugehorungen verschriben und vermachet in alle der mazze, ||
als in synen furstlichen briven da noch begriffen ist in semlichem lute. Wir Bolke von Gots gnadin herczog von Slezien, herre von Furstenberg, czu der Swidnicz und czu||
dem Jawor , bekennen und tun kunt offenlich mit disem brive allen den, dy in sehen adir horen lesen, das wir haben angesehen die sunderliche gnade und fruntliche gunst ||
des allirdurchluchtigsten fursten und herren hern Karls, romischen kungs, czu allen cziten merer des reiches und kungs czu Behem, unsir lieben genedigen herren, di her ||
uns und unsirn geslechte bewisit hat mit der konschaft, die geschehen ist zwischen im an eime teile und der durchluchtigsten furstinnen frawen Annen, der romische||
kuneginnen und kuneginnen czu Behemn , unsir liber frawen und mumen, etwen herczogen Heinrichs, seligen unsirs brudir tochtir an dem andirn, und darumb geben, machen ||
und verschriben wir der obgenante unsir liben frawen und mumen als einer kunginne czu Behem und ires leibes erben, di sie mit dem obgenanten unsirn herren dem kunge haben ||
wirdit, unsir herczogetum, furstentum und herschefte czu der Swidnicz und czu dem Jawor mit den stetin Swidnicz, Stregon, Hayn, Landishut, Richenbach, Nympcz, Jawor, ||
Lewenberg, Hirsberg, Bunczlaw und Czoboten mit den vesten und merkten, Griffenstein, Grifenberg, Leen, Schonow, Kliczchdorf, Hornsberg und Kinsperch mit allen mannen, manschef¬ ||
ten, lehen, lehenscheften, furlehenten guten, gerichten, czollen, munczen, czinsen, gulden, kreizzen, wichbilden, kirchlehen, pfrimden und Gots gaben, welden, puschen, bergen, ||
slichten, wazzern, wazzirlouften, molen, wesin, weiden, geieide, vogilweide, rechten, nuczen, gewonheiten und allen czugehorungen, wi man die bennennen mag, mit sunderlichen ||
worten nichtisnicht uzczunemen in allir der mazze, als wir is iczunt haben, und her noch mit rechte czu uns brengen mochten in sulcher bescheidenheit. Sei das sache, ||
das wir von Gotis verhencnizze also vorscheiden, das wir eliche leibes erben mannis geslechte hinder uns nicht lazzen, das denne die obgenante unsir genedige frawe und liebe ||
mume und eris liebes erbin, die sie mit unsirn herren dem kunge haben wirdit, als do vorgeschrebin stet, die selben unsire herczogtum, furstentum, herschefte, lant, lute und ||
alle andir czugehorunge, als do vor begriffen ist, erben und besiczzen sal genczlichen ungehindirt, und do mite tun und lazzen noch freir willekur als mit irem rechten erbe ||
unschedlich, doch der hochgeborn furstinnen frawen Agnisen, unsir elichen wirtinne, in irem leipgedinge, wenn sie all die obgenante furstentum, lant und herschefte mit allen ||
nucze habin und besiczzen sal, nur czu iren lebtagen. Wer abir, das wir mit gnaden Gots eliche leibis erben mannes geslechte gewinnen, so sullin die selbin unsir erben ||
der obgenanten frawen und mumen adir iris leibis erben, ob sie nicht were, czehen tusent schog grozzir pfennige pregischer muncze mit gereitem gelde berichten unde ||
beczalen. Odir die vesten Lewenberg und Bunczlaw mit wichpilden, vesten, rechten, nuczen und zugehorungen czu rechtim pfande seczen, als lange uncz, das sie die obgenanten czehen ||
tusent schog genczlichen berichten und beczalen, und do mite sullen, denne die selben unsir erbin bi dem obgenanten unsirn furstentum, herschefte und landen ungehin¬ ||
dirt bliben. Wer ouch, das wir eliche liebes erben mannes geslechte nicht hetten und doch tochtir liezzen, so sullen die obgenanten unsir liebe genedige frawe odir ires liebes ||
erben, die sie mit unsirm herren dem kunge gewinnit, ytlicher unser tochtir czehen tusent schog grozzer pfennige gebin und sie bestaten noch rechtir gewonheit als ||
gebornen fursten kindir. Ouch haben wir gelobt und geteidingit sie das sache, das die obgenante unsir eliche wirtinne unsirn tot gelebte, das sie denne noch der czit unsirs ||
todis keinen burggraven, pfleger adir amptman uf vesten, husirn, in steten adir in landen verkeren, andirn odir wechsiln sol, ez sie dann, das sie eynen biderman, der do glich, ||
gut und gewizz sei, dem ersten an sin stat seczze an dem der obgenanten unsir frawen odir iren erben moge billichen genugen, und das der czu vor sich allir gelubde, eide und truwen vorbunden ||
habe, der obgennante unsir frawen der kuneginne odir iren erben, gelich sinem vorfaren an des stat hergeseczet wirdit. Wer ouch, das die obgennante unsir frawe, genedege und liebe mume, warten¬ ||
de des anevalles e, wann sie in gewer keme also sturbe, das sie leibis erben mit dem obgennanten unsirn herren nicht gewinne, so sullen alle man, ritter, knechte, burggraven, burger ||
und alle lantsezzen, all der obgenannten eide und gelubde ledig sein. Doch in sulcher bescheidinheit, das dem obgennanten unsirn herren dem kunge und synen erbin das obgenante egelt und ||
heimsteur der obgenanten czehen tusent schog gevallin sol odir mit pfandin gesichert wenden in all der mazze, als do vor begriffen ist, das sie do mite tun und lazzen noch freyr ||
willekur, und das gebin, wen sie wollen. Wer ouch, das die obgenante unsir frawe und mume den obgenanten unsirn herren den kung obirlebte und einen andirn man neme an unsirn dank ||
und willen, so sullen beide sie, der man und alle kint, die sie mit in gewinnit in dem obgenanten unsirn furstentume und herscheften nichtisincht habin. Ouch ist geredet und ||
geteidingit, das die obgenante unsir vrowe die kuneginne und unsir liebe mume noch ymand von iren wegen uns und unsir erben mannes geslechte umb keinerlei erbteil adir ||
umb keine andir sache anreden adir ansprechen sullen, anders wenn do vor geschrebin ist. Ouch meinen und wellen wir, sei das sache, das uns chaftege not antreten wir¬ ||
den umb gevenknisse, krieg odir andir geschichte unsir odir unsir manne, ere und liep czulosen, das wir dem der selben unsir furstentum, lant und lute gewaldik sin czu ||
tun und czu lazzen. Doch in guten truwen an alle geverde, dornoch und sint dem mal, das uns der obgenante unsir genedigen herre mit sulchen sinen gnadin gunstlich unde ||
fruntlich begriffen hat, so geloben und wellen wir im mit guten truwen on geverde beistendik sin und beholfen wedir allirmenlichen, nymand uzczunemen, und in nimmer ||
unde wegen czulazzen mit leibe noch mit gute. Unde sine veinde sullin unsir veinde sin. Und meinen und wollen ouch keine syne wedirsachen odir veinde cristen, juden odir ||
heiden in unsirn landen, husen, hofen, haldin odir vorteidingen, die wedir das recht sin, und nicht recht tun wollen. Die gunnen wir im und synen amptluten, das sie die selben angrif¬ ||
fen und rechtvertegin sullen und mogen, wo sie der bekomen in allen unsirn herscheften und landen. Mit urkunde dis brives, versegilt mit unsirn grozzen ingesegil, der gegeben ist ||
czur Swidnicz noch Crists geburt driczenhundirt in dem dri und funfzegsten jare an der nehesten mitewochen noch santh Petirs und Pawils tag der heilegen czwelfboten. ||
Davon durch sundirlich gebot des obgenanten fursten und herren herczogen Bolken, unsir lieben genedigen herren, der uns das geboten und geheizzen hat mit lebender stime ||
und in offenbarer geginwortikeit seiner edlin getruwen manne, so habe wir mit wolbedachten mute, mit worte, gunst, wizzen und willen der ganczen gemeinschaft, ||
allir unsir meteburger, der obgenanten allirdurchluchtigsten furstinnen, der romischen kuneginn und kuneginn ze Behem, vrowen Annen, unsir gnedigen vrowen, und ||
ires leibis erbin, die sie mit dem obgenanten fursten und herren kung Karl, irem elichem wirte gewinnet, gehuldet und gelobt und gesworn, hulden, geloben und sweren, ||
das wir, wenn ez czu sulchen schulden komt, als dovor geschriben stet, in unsirs herren herczogen Bolken briven, ir und den selbin iren leibes erben, wenn sie die mit ||
hilfe Gots gewinnet, getruwe, gehorsam, wartende und undirtenig sin wollen und sullen, als unsir naturlicher und angeboren herschaft in all den punkten, meinugen und ||
artikiln, und in all der mazze, als die obgenanten unsirs herren herczogen Bolken brive sprechen, uzgenomen doch den artikel, der czu dem leczten in dem selbin brive stet, umb ||
di hilfe, die beide der obgenante kung Karl und ouch unsir herre herczog Bolke einandir tun und leisten sullen, wann uns die selben gelubde nicht anegen und czu den andirn ||
unsirn sachen, doruff wir gelobt und gesworn haben, nicht gehoret. Mit urkunde dicz brives, versegilt mit unsir ingesigel, der gegebin ist czu der Swidnicz noch Crists||
geburt driczenhundirt und dar noch in dem dri und fumczigsten jare des nehesten dunrstagis noch santh Petirs und Pawels tage, der heilegen czwelfboten .