||
Wir Ruprecht der Junge von Gotz gnaden pfalentzgrave an dem Rin, dez heiligen richs oberster||
thruses und hertzog in Beyern , bekennen uns offenbar an disem briefe, daz wir uns erkant ||
haben und bekennen uns auch mit disem briefe, daz die burg genant der Sthörenstein und ||
die stat genant die Nuwenstat und allez daz, daz dar zu gehort, erbeliche und eweclich ||
sin sol unsers gnedigen herren, dez allerdurchluchtigisten hern Karl dez romischen kuniges und||
kunig zu Beheim , und siner erben also, daz die vorgenante burg und stat und waz ||
dar zu gehort eweclich zu der cronen zu Beheim gehoren sol, und verczihen für uns und ||
alle unser erben, aller der rechte und aller der ansprach, die wir oder unser erben an ||
die vorgenanten burg und stat gehaben mochten. Und dez zu urkunde so gebin wir unserm ||
vorgenanten gnedigen herren, sin erben und der cronen zu Beheime disen brief, versigelt mit ||
unserm hangenden ingesigel, der geben ist zu Mentze an dem mantage nach sant Thomas||
tage dez jars, doman zcalt von Cristes geburt drutzehen hundert jar in dem dritten||
und funftzegistem jare .