||
Vir der burgermeister, der rat und die burger gemeinlichen der stat zu Eger bechennen und tun kunt offenlichen mit disem brive allen den, di in sehen oder horen lesen, allein die brive ||
des allerdurchluchtigsten fursten und herren, herren Karls romisch kunigs zu allen ziten merer des reychs und kunigs zu Behem, unsers liben genedigen herren, di er uber sein pfantschefte ||
der stat und des lands zu Eger und der vesten Flozz und Parckstein und waz dar gehoret gehabt hat und di auch seliger geduchnuss di hochgeborn fursten, etwenn kunige zu Behem, ||
sein eldern, durch merklicher sachen willen von dem heyligen reyche behalden und erworben haben, von widerzemer ungeschicht beide verbrennet und verlorn sint, daz er damit sein reht niht beweisen ||
mage, als billich wer, doch, sint demmal, daz di selb pfantschaft den kurfursten des heyligen reichs, beide geistlichen und werltlichen, wol kundig ist und si ir brive gezeugnuss mit ire ||
anhangenden insigeln daruber geben haben, und wir auch sulcher gelegenheit wol und gentzlich underwiset sin, daz di obgenant stat zu Eger mit dem lande und di vesten Flozz und Parckstein ||
mit allen zugehorungen dem kunigriech und der cronen zu Beheim umb virtzig tusent marck lotiges silbers, sehst halben guldein floren gewiht fur ie di marck ze reiten, zu rehtem pfande, reht ||
und redlich, von wegen des heiligen reychs versetzet sint, und sein eldern und vorvarn, kunige zu Beheim, in gewere und rehter besitzunge der selben pfantschefte gewesen sint und er noch ist ||
auf disen hutigen tage, wanne auch di obgenanten kurfursten, geistliche und werltliche, angesehen haben die besunder genade, den nutzen fleizze und di steticleiche arbeyt, da mit der obgenant unser ||
herre des heiligen reichs nutz und ere getrewlich understanden hat, und auch gebruvet haben di merklichen getrewen dienst, di sin eltern, etwenne hochgeborn kunge zu Behem, dem obgenanten reiche ||
erlichen und nutzlichen offt getan haben, wanne auch daz kungriche zu Beheim ein edlez, wirdigez gelyet ist der römischen cronen, so meynten und wolten si sulchen schaden des obgenanten ||
kunigrichs zu Beheim vernunfticlichen untersten durch di besunder trewe, da mit si als kurfursten dem heyligen reiche verbunden sein, auf di rede, daz der obgenant unser herre daz selbe sein kunig¬ ||
riche und di crone zu Beheim durch sulchen zweyvel icht beschedigt oder gehindert, werden, so haben si bekant mit wolbedachtem mute, mit rechter wizzen und mit iren offnen briven, daz ||
di obgenant stat zu Eger mit dem lande und di vesten Flozz und Parckstein mit merckten, dorffern, mit edlen und unedlen, armen und reichen, kreizzen und allen zugehorungen, ||
di in den gemerken der selben lande und vesten gelegen und gesezzen sint, des obgenanten unsers herren, als eines kungs zu Beheim, siner erben und nachkumen, kunge zu Behem, unde ||
der cronen des selben kungrichs rehte pfantschafte lange gewesein sein und noch sein fur virtzig tusent marck lotigs silbers sulches gewihtes, als do vor begriffen ist. Und di selben ||
pfantschaft haben di selben kurfursten bestetigt mit rechter wizzen in aller der mazze, als do vor begriffen ist, und haben auch dar zu geben ire gunst, willen und wort, als si des ||
macht haben, als kurfursten des heiligen römischen reichs. Des haben wir angesehen di redliche gezeugnuzze und kuntliche underweisunge, als dovor gesehriben stet, und do von ||
wir, der obgenant burgermeister, der rat und di burger gemeinlich der stat zu Eger, mit rate, gunst, wizzen, willen und worte unser gemeinschefte, unbetwungen, mit ||
freyer wilkur und mit wolbedahtem mute fur uns, unser erben und nachkumen, so haben wir gehuldet, gelobet und gesworen, hulden, geloben und sweren dem obge¬ ||
nanten unserm herren kunge Karle, als einem kunge zu Beheim, sinen erben und nachkumen, kungen zu Behem, und der cronen des selben kungrichs, daz wir in zu den ||
vesten Flozz und Parckstein semmentlichen zu einem rehtem pfande fur di obgenanten virtzig tusent marck silbers, als do vor begriffen ist, getrewe holt, undertenick ||
und gehorsam sein wollen und sullen, als unsern rechten herren. Mit urkunde ditzs brives, versigelt mit unser stat insigel, der geben ist zu Eger nach Crists geburte||
uber dreutzehen hundert jar und dar nach in dem vir und funftzigsten jar, an dem nehsten sunntage nach Ostern, als man singt Quasi modo geniti .