||
Wir Heinrich Schenke von Friedeburg und Ulrich Schenke von Rychenecke bekennen uffenliche und tun kunt allen luten, dy diesen brieff ||
sehent, horent oder lesent, daz wir dem allerdurchluchtigesten fursten und herren, hern Karlen romschem kunge zu allen zeiten merere dez reiches||
und kunge zo Beheim , unsern gnedigem herren, seine lebetage di vesten zu Helfenberg von der kinde wegen zu Erenfels, der dy selben vesten ist ||
und di in unser momparschaft sint, verbunden und verstricket han in aller wyse, als herna geschrieben steet, von erst sal man unserm egenanten herren ||
dem romschem kunge, als lange er lebet, di vorgenanten vesten, wanu er dez gesinnet, uffenen und sich dar usz und dar in wyder allermenlichen ||
behelfen lazzen zu allem seinem willen und an alle hindernuzze und wydersprache, und wann unser egenante herre der kung wil, so mag er kost und ||
lude zu seinem willen in di egenanten vesten schicken, sich da myde wyder allermenlichen zu behelfen, also doch daz er beware und bestelle, wie ||
iz mit yme queme, ob er verfure, daz Got verbiete, daz dan di lute, di er in die vorgenanten vesten geschicket hette, di selben vesten uns oder den ||
vorgenanten kinden von Erenfels, ob si zu yren jaren quemen, wieder antwerten sullen ane alle wiederrede und hindernuzze. Ouch sullen wir di vorgenanten ||
kindere von Erenfels bei di egenanten vesten zu Helfenberg nyt komen lazzen, si enehaben von erst unserm egenanten herren dem kunge gelobet, gesichert ||
und zu den heiligen gesworn und yn, das ym wol genunge, sicher gemacht, daz si stete und veste halden sullen genczliche und unverbrochenlich ||
alles daz, daz da vor geschrieben steet. Alle dise egenante sache und ir iecliche besunder han wir unserm egenanten herren den romschem kunge in guten ||
trewen gelobet, mit rechter sicherheit gesichert und uffenliche zu den heiligen gesworn, stete und vestliche unverbrochenliche zu halden und nit ||
dar wieder zu tune in keyner hande wyse, uzgescheiden allerley argelist und geverde an allen dysen egenanten sachen und an ir ieclicher besunder. ||
Und aller dyser egenanten stucke zu stediger warheit und urkunde han wir Heinrich und Ulrich vorgenante unsere ingesiegele an dysen briff ||
gehangen, der gegeben ist, da man zalte nach Cristus geburte druczehen hundirt jar und darna in dem vier und funffczigestem jare||
uff sente Johans dez Heiligen Teufers tag als er wart geborn, .