||
Ich Hainreich Grozz, schulthaizzer, und wir, die scheppfen der stat ze Nürnberch veriehen offenlichen ||
mit diesem brif, daz der veste ritter her Hainreich vom Wildenstain veriehen und bechant hat ze Nürnberg ||
in offem rat, daz in der erberge und weise her Witiche, lantschreiber in Beyern, beriht und bezalt ||
habe fünf tawsent geschok und ahtzig geschok behaimischer grozzen von dez allerdurhleuhtigsten ||
fürsten wegen unsers genedigen herren, hern Karls, dez romischen kaysers und kunges ze Behaim, ||
der er in bezalt habe umb die vesten ze dem Rotenberg, alz ain kuonig zu Beheim. Und derselbe ||
her Hainreich vom Wildenstain sagt auch für sich und alle sein erben den vorgenanten unsern genedigen ||
herren, den romischen kayser als ainen kuonig von Behaim, darzu alle sein erben und nachkumen, ||
darumbe ledig und loz, also daz derselbe her Hainreich vom Wildenstain und sein erben dehain vorderunge ||
noch ansprach darnach nimmer gehaben noch gewinnen sullen furbaz ewiglichen genczlich on geverde. ||
Mit urkunde dicz brifes, der mit urtail geben ist, versigelt mit unsers gerihtz anhangendem in¬ ||
sigel. Dez sein zeug die ersamen manne Ulrich Stromair hern Conrats sun, Berhtolt Tucher und Berh¬||
tolt Pfinczinch , sein aydem, Hainreich Gewder und Seicz Holczschuher. Der brif ist geben an dem ||
samstage nach dem heiligen ostertagen nach Gotes gepurt drewzehenhundert iar und in||
dem sehtzigstem iar .