||
Wir Johans, Jurge und Thomas, bruder genant Freuntzberger, bekennen und tun kunt offinlich mit diesem brieve allen den, die yn ||
sehen odir lesen, wann der allirdurchluchtigiste furste und herre her Karl von Gots gnaden romischer keiser, zu allen zeiten merer des||
richs und kunig zu Beheim , unsir lieber gnediger herre, vor alle schult, die er und seliger gedechtnuzze der hochgeborn furste und herre ||
her Johans, etwenn kunig zu Beheim, sein vatter, unsir lieber herre, uns und unsirn erben und nachkomen schuldig gewesen seint und ||
doruber wir yre brieve gehabt haben, uns von unsir und unsir erben und nachkomen wegen syben hundert guter guldin geben und ver¬ ||
richtet hat gnedeclich, domit uns wol benuget und danken seinen gnaden und dorumb sagen wir den egenanten unsirn gnedigen herren den keiser, ||
seinen vatter seligen und ir erben und nachkomen aller schult, die sie uns und unsirn erben schuldig gewesen seint, doruber wir brieve ge¬ ||
habet han odir nicht, in welcher weis die schult ist gewesen, los und ledig, und wollen der nymermer gefordern, und ob dheine brieve umb ||
soliche schult in dheinen zukunftigen zeiten zu lichte quemen und vorbracht wurden, die sullen keine craft noch macht haben in dheine ||
weis und sullen uns, unsirn erben und nachkomen keine hulfe bringen. Mit urtkund ditz brieves, versiegelt mit myn Johansen insigel ||
vorgenanten, und wir Jurge und Thomas, bruder des obgenanten Johans, bekennen uns aller dieser vorgeschriben dinge under desselben unsirs bruders ||
insiegel, wann wir unsirs eygen insiegel nicht enhaben zu diesem male. Geben zu Nuremberg nach Cristus geburt drutzenhundert jar, dornach ||
in den sechtzigstem jare an sant Jacobes tag, des heiligen aposteln .