||
Wir Johans, Jurge und Thomas, gebruder genant Fruntzberger, bekennen und tun kunt offinlich mit diesem brieve allen den, die yn sehent odir horent ||
lesen, wann der allerdurchluchtigiste furste und herre her Karl, romischer keiser, zu allen zeiten merer des reichs und kunig zu Beheim, unsir lieber gnediger ||
herre, uns des begnadiget hat und gunnet, daz wir solicher brieve gebruchen mogen dreu jar nacheinander zu zelen, die sich anheben sullen, als dieser ||
gegenwertiger brieff geben ist gegen dem hochgeborn fursten und herren her Ludowige dem Eltern, marggraven zu Brandemburg und hertzogen in Beyern, ||
die uns der hochgeborn furste und herre her Johans, marggrave zu Merhern, geben hat zu den zeiten als er grave zu Tyral und herezog in Kernten ist ||
gewesen, so globen wir in guten trewen als schire die vorgenanten dreu jar vergangen seint, daz wir dieselben brieve gantz und gar antworten und geben ||
sullen, den vorgenanten unserm herren dem keiser odir dem marggraven von Merhern, yren erben odir nachkomen ane allen verczog und wiederrede. Mit urt¬ ||
kund dicz brieves, versiegelt mit min Johansen insiegel vorgenanten, und wir Jurge und Thomas, bruder obgenanten Johans, bekennen uns aller dieser vorgeschriben ||
dinge under desselben unsirs bruders insiegel, wann wir unsir eigen insiegel nicht enhaben zu diesem male geben zu Nuremberg nach Cristus geburt ||
drutzenhundert jar dornach in dem sechtzigstem jare an sant Jacobs tag, des heiligen aposteln .