||
Wir Karl von Gots gnaden römischer keyser ze allen zeiten merer des reichs, wir Wentzla ouch von Gots gnaden kunig ze Behem und margraf ze Brandenburch, des yetzgenanten unsers liben herrn und vatters keyser Karln sun, und wir Johans von den||
selben Gots gnaden margraf ze Merhern , desselben unsers herrn des keyser bruder, an aim taile, und wir Rudolff, Albrecht und Leuppolt, gebruder, von Gots gnaden herczogen ze Osterreich, ze Steyr und ze Kernden, herrn ze Krain, uf der Windischen marich und ze||
Porttnaw, grafen ze Habsburch, ze Tyrol, ze Phirtt und ze Kyburch, margrafen ze Burgow und lantgrafen in Elsazz , und wir Margret von Osterreich, der ytzgenanten herczogen swester, weilnt margrefinn ze Brandenburch, herczoginn ze Bayrn und grefinn ze||
Tyrol an dem andern taile, veriehen, bechennen und tun kunt von baiden tailen offenlich mit disem brif allen den, die in sehen, horen oder lesen, nu und hinnach ewichlich, seid dem male daz nach ordenung und geschicht des almechtigen Gots wir baidenthalben ||
durch einander von natur und der gepurd wegen des geslechts sipplich zu einander gehoren, in solicher mazze, dwederr tail under uns gar abgieng, und verfur an elich leiberben, daz derselb tail dem andern aller siner lande, furstentumme und herschefte, die er also hinder im liezze, pillich ||
und von recht gunnen sol fur all ander leutt, dez darumb wir in dem namen, alz da vor uf baiden teilen nach guter vorbetrachtung, mit rechter wizzen nach rate, willen und gunst aller unserr fursten, lantherrn, rittern und knechten, purgern und lantsezzen in allen unsern ||
landen und steten, die notdurftig darzu waren, mit aller der ordenung, bescheidenheit und kraft, worten, werken und geperden, die nach geistlichen und weltlichen rechten oder gewonheiten und nach dhainerlay lantrechten oder freyheiten darzu gehorent, einander getan haben recht ||
und redlich solich gemechtnuzze, ordenung und gabe, alz hienach beschaiden ist. Das ist ze merkchen, ob das geschech, da vor Got sey, daz wir, die vorgenanten keyser Karl von Rom, kunig Wentzla von Behem und margraf Johans von Merhern, und unser aller eliche kint, sune ||
und tochter, die wir nu haben oder hernach gewinnen, abgiengen und verfaren ane elich leiberben, und ouch ob diselben unsere kinde leiberben gewinnent, die ouch furbazzer an leiberben verfuren, und unsere lande also rechter leiberben, die von uns, unsern kinden und kindes kinden ||
komen mochten, erblos wurden, daz dann alle unserev erblichev furstentum, lande und herschefte, vesten und stett, leutt und guter, die wir nu haben oder hernach gewinnen, erben, und gevallen sullen mit vollem und ganczem rechte auf die vorgenanten herczogen von Osterreich, die ||
egenanten Margareten, ir swester, und uf ir aller leiberben, sune und tochter, die in Got noch geben mag, und uff derselben kint und kindes kint nach dem rechten stammen ewichlich, die von irn leiben komen mugen, an all geverde. Und ze gleicher weis hinwider sprechen und ||
wellen wir, die vorgenanten herczogen von Osterreich, und wir, die egenanten Margret, ir swester, ob das geschech, das Got durch sein gnade wende, daz wir und der durchleuchtig furst, her Ludwig kunig ze Ungern, unser liber bruder, und die hochgeborn fraw kuniginn Elizabeth, sein muter, ||
und die hochgeborn Elspet, weilnt herczog Stephans von Ungern, seins bruder tochter, unser liebe swester, abgiengen und verfuren ane eliche leiberben, und ouch ob wir an demselben unserm taile leiberben gewinnen, die furbazzer ane leiberben verfuren, und unsere lande also ||
rechter leiberben, die von uns, unsern kinden und kindes kinden komen mochten, erblos wurden, daz dann alle unsere erblichev furstentume, lande und herschefte, vesten und stett, leutt und guter, die wir die vorgenanten herczogen von Osterreich, und Margaret, unser swester, nu haben, ||
oder hernach gewinnen, erben und gevallen sullen mit vollem und ganczem rechte uf die vorgenanten keyser Karln von Rom, kunig Wentzla von Behem und margraf Johansen von Merhern und uf ir aller leiberben, sune und tochter, und uf derselben kint und kindes kint, nach ||
dem rechten stammen ewichlich, die von irn leiben komen mugen, an all geverde. Doch mit solichem underschaide, daz uf baiden tailen igliche unser lande und leutt, sunderlich, wem halt die gevallent, beleiben suln ewichlich bey allen den rechten, freiheiten, gnaden und ||
guten, gewonhaiten, die si von alter gehebt und herpracht habent, ane all geverde. Wir haben ouch in dem namen, alz da vor, uf baiden tailen wizzentlich fur unsselber und fur all unser erben und erbes erben, alz vor beschaiden ist, ewichlich gesworn leiplich aide zu ||
den heiligen mit angerurten handen uf das heilig ewangeli, und ouch gelobt mit unsern trewen und mit den worten unser furstlichen wirdichait, daz wir uf dwederm taile wider dise vorgeschriben unser gemechtnuzze, ordenung und gabe mit unsselber noch mit ||
andern leuten weder mit gerichte, noch ane gerichte, noch mit dhainen andern sachen des rechten oder der getat, haimlich noch offenlich, nymmer getun sullen noch wellen, und ouch nymdnn gehelen, der da wider tun wolt, an all geverde, und verzeihen uns ouch ||
darumb baidenthalben in dem namen, alz da vor solicher anzzug funde, da mit wir in dem namen, alz da vor uf dwederm tail, hernach komen und sprechen mochten, daz wir diser gemechtnuzze und gabe betwungen weren, oder daz dwederr tail den andern ||
unredlich und unpillich dar hinder pracht hiet, oder daz si nicht recht und redlich geschehen weren, und widersagen ouch darumb helffe und rate aller geistlicher und weltlicher richter rechten und gerichten, sunderlich dem rechten, damit man versereten und ||
entwerten leuten ze helff komt und wider in ir gewer seczet, und dem rechten, das da sprichet, gemayn verzeihung vervahe nicht, ez ge dann ain gesunderte vor, und allen andern geistlichen und weltlichen geschriben und ungeschriben, gestiften und unge¬ ||
stiften, funden und unfunden, rechten, freyhaiten, lantrechten und gewonhaiten, und allen hantfesten und priefen, die wir nu haben oder hernach gewinnen mochten, da mit wir uf baiden tailen, oder yman von unsern wegen wider dise vorgeschriben unser ordnung, ge¬ ||
mechtnuzze, und gabe allcklich, oder bey tailen ymmer getun mochten, in dhainen weg an alle geverde. Und werer, da vor Got sey, daz wir uf dwederm tail unsselb vergezzen, und ymmer da wider icht gereten, oder des wir nicht getrawn, ob unser dwederr ||
tail vormals dhaine brife gegeben hiet, oder hienach dhaine ander brife gebe, die wider dise vorgeschriben unser ordenung, gemechtnuzze und gabe, in dhainen weg weren, die suln irrig, uppig, tod und absein und chain kraft haben noch gewinnen, wan wir ||
sey in solicher geschicht mit disem brife wizzentlich abnemen, vernichten, totten und widerruffen genczlich, und sol alayn diser brif und des geleichen vor und nach allen andern brifen, die dise sache berurent, in seiner kraft genczlich und ewichlichen beleiben an ||
all geverde und arge liste. Wir, der vorgenanten keyser Karl von Rom, haben ouch alz ein romischer keyser wizzentlich mit keyserlicher mechte volchomenhait dise vorgeschriben ordenung, gabe und gemechtnuzze durch frides und gemaines guts willen ||
nach rate der fursten des heiligen reichs, geistlicher und weltlicher, die dozemal bey uns warn, baiden tailen verhenget, gegunnen, beweret, gevestent und bestettet, recht und redlich, verhengen, gunnen, beweren, vestenen und bestetten si ouch fur uns, ||
und unser nachkomen an dem heiligen reiche, ewichlich mit disem brife in aller der mazze, alz vor beschaiden ist, an alle geverde, und ob das wer, daz dhain keyserliche recht oder gesetzt, die nu funden und geschriben sind, oder hernach funden und geschri¬ ||
ben werdent, wider dise vorgeschriben unser gemechtnuzze ordenung und gabe, in dhainen weg allcklich oder bey tailen weren, die nemen wir ab und widerruffen, totten und vernichten si in disen sachen mit unserm keyserlichem gwalt genczlich und ||
ewichlich, wan wir wellen und mainen in dem namen, alz da vor, daz dise gemechtnuzze ordenung und gabe, uf baiden tailen ewichel in ganczer vester stetichait unverbrochenlich beleibe und gehalten werde, in aller der mazze, alz vor beschaiden, ist an alle geverde. ||
Darumb von baiden den vorgenanten tailen gebieten wir vestichlich bey unsern hulden allen unsern geistlichen und weltlichen fursten, prelaten, grafen, freyen, dinstherrn, lantherrn, rittern und knechten, purgern und lantsezzen uf dem lande und in den steten und ||
allen unsern undertanen gemainlich, in welichen wesen, und wie si genant sind, daz si die vorgenanten unser ordenung, gemechtnuzze und gabe, uf soelich geschicht, alz vorgeschriben stet, loben und sweren zu den heiligen, stete ze haben und ze volfuren genczlich, ||
swenn ez ze schulden kumt, an all widerrede und geverde, und ouch daruber geben ir offen versigelte brife. Und daruber zu ainem waren vestenen, offenem und ewigem urkunde aller der vorgeschriben ordenung und sachen haben wir, die vorgenanten ||
kayser Karl von Rom, kunig Wentzla von Beheim und margraf Johans von Merhern, fur uns, und fur all unser erben und erbs erben, ewichlich, alz vor beschaiden ist an aim taile, und wir, die egenanten Rudolff, Albrecht und Leuppold, gebruder, hertzogen ze||
Osterreich , und wir, die egenanten Margrete, ir swester, fur uns, und fur all unser erben und erbs erben, ewichlich, alz vorgeschriben stet, an dem andern taile, unsere insigele gehenkt an disen brif. Diz ist geschehen und ist diser brif gegeben ze Brunne, nach||
Krists gepurde dreuczehen hundert iar und darnach in dem vir und sechtzigistem iare, an der heiligen junchfrawn sand Scolastice tag, unser kayser Karls reiche in dem achtzehenden und des keysertums in dem newnten jare .

||
Imperator, rex Boemie, marchio, dux Ruodolf, dux Albrecht, dux Leupold, marchionissa Brandenburgensis.