Wenceslaus dei gratia Romanorum rex semper augustus et Boemiae rex. Notum facimus tenore praesentium universis, quia dudum ab honorabilibus et religiosis . . abbate et conventu monasterii nostri Sanctae Coronae ordinis Cisterciensis; devotis nostris dilectis infrascriptas villas videlicet Pergfride, Saldenow, Schonaw, Purgstal, Sonberg et Hynttringe¹ ad praefatum monasterium nostrum cum ipsorum (sic, ipsarum) pertinentiis spectantes pro usibus nostris de praedictorum abbatis et conventus consensu et assensu recepimus, easdem quam diu nobis vita ex alto concessa fuerit absque impedimento quolibet pacifice et quiete realiter possidendas, prout idipsum in eorundem abbatis et conventus litteris maiestati nostrae desuper datis plenius est expressum. Sed quia praedicti monasterii nostri futuris periculis obviare et cavere volentes, nos non per errorem aut improvide sed animo deliberato virtute praesentium de certa nostra scientia decernimus et volumus expresse, praedictas villas cum ipsorum pertinentiis universis, in quibuscunque consistant, quemadmodum nos easdem in potestate nostra ad praesens habemus et tenemus, post mortem nostram, quam deus diu avertat, ad abbatem et conventum monasterii Sanctae Coronae supradicti viceversa devolvi et reverti integraliter et ad plenum, impedimentis quibuslibet penitus procul motis. Praesentium sub appresso nostro minori sigillo testimonio litterarum. Datum Pragae anno domini millesimo quadringentesimo duodecimo, die vicesima Januarii, regnorum nostrorum anno Boemiae quadragesimo nono, Romanorum vero tricesimo sexto.||
Per dominum Conradum episcopum Olomucensem Johannes de Bamberg.||
Auf der Rückseite: Registrata.

Source Fulltext: PANGERL, Goldenkron (=FRA II/37, Wien 1872) S. 363-364