Wencezlaus dei gratia dominus et haeres regni Boemiae et marchionatus Moraviae. Si cunctos decet principes praedecessorum suorum quibus nulla propinquitatis astringuntur linea, voluntatem firmiter observare, multo magis illos decet suorum maiorum vota cum effectu inviolabilis observantiae prosequi, qui non alienis fortunae suffragio, sed parentibus naturae ac legis inperio (sic) ut sui succedere dinoscuntur haeredes. Per hoc igitur privilegium noscat tam praesens aetas quam successura posteritas futurorum, quod nos beneplacitum olim domini O. incliti quondam regis Boemiae patris nostri observare atque observari facere cupientes, donationem civitatis Notalitz cum villis, silvis, pratis, pascuis, aquis, aquarum decursibus, rubetis, agris, cultis et incultis, exstirpationibus factis et faciendis, et demum cum omnibus iuribus et attinentiis dictarum civitatis et villarum tam nunc sitarum quam in posterum in praediis vel exstirpationibus ad eamdem civitatem spectantibus situandarum seu ponendarum, quam dictus pater noster fecit claustro Sanctae Coronae, quod ipse fundavit, ratam et gratam habentes, praesenti privilegio confirmamus; et privilegiantes eandem donationem omni libertatis et immunitatis privilegio. Eximimus dictam civitatem Notalicensem cum omnibus et singulis supradictis ad eamdem civitatem spectantibus ab omni exactione et vexatione iudicum, monetariorum, theloneariorum et qualibet violentorum infestatione, nec non et a violentia personae cuiuslibet, cuiuscunque conditionis existat, et quod propter aliquam culpam nullus ex hominibus in praefatis civitate aut villis residentibus citari vel trahi debeat aut valeat ad iudicium vel coram alio conveniri nisi ad Pragense iudicium coram nobis aut beneficiariis Pragensibus in ipsa Praga vel coram iudice dicti claustri, et omnino dictas civitatem, villas et ipsarum attinentia gaudere volumus qualibet immunitate, qua olim praefatus pater noster gaudere voluit dictum claustrum, prout in ipsius claustri fundationis privilegio plenius continetur. In cuius rei testimonium et robur perpetuo valiturum praesens privilegium fieri et sigillis nostris fecimus communiri. Datum Pragae per manus magistri Welizlai Pragensis et Wissegradensis canonici, anno ab incarnatione domini millesimo ducentesimo octogesimo quarto, quarto Idus Januarii, duodecimae indictionis.

Source Fulltext: PANGERL, Goldenkron (=FRA II/37, Wien 1872) S. 31-32