+ In nomine domini nostri Iesu Christi. Anno vero ab incarnatione eius millesimo septuagesimo primo et vicesimo nono anno principatus domni nostri Gisulphi gloriosi principis, mense decembri nona indictione. Dum coram presentia domne Gemme principisse filie bone memorie Laidulfi comitis, que fuerat uxor beate recordationis domni Guaimarii gloriosi principis et ducis, essem ego Petrus iudex cum pluribus hominibus, ipsa domna Gemma ostendit unum preceptum ita continens: In nomine Sancte et individue Trinitatis. Gisulfus divina favente clementia Langobardorum gentis princeps. Nostras ad Deum tendere preces confidimus si dignas petitiones nostrorum fidelium non contempnimus et eosdem fideles nostro beneficio nobis fore credimus fideliores et in nostro servitio promptiores, et ceteros ea que benefecerimus arbitratos fidelius nostris obedire preceptis. Idcirco materno affectu commoti, per interventum domne Gemme principisse karissime genitricis nostre, idipsi genitrici nostre concedimus integrum albeum et flumen de loco Veteri, quod per eum fluit, ab eo loco quo nuncupatur Abissu usque litus maris cum ripis ex ambobus lateribus et cum vice de via sua, ut semper sint in potestate eius et heredum illius et illa et eius heredes licentiam habeant ex eo facere quod voluerint, et quando illa et eius heredes voluerint, licentiam habeant in ipso albeo, quod ei sicut prefatum est concedimus, antepositiones facere et palos in eo et in ipsis ripis figere et congeries facere et habere et ipsum flumen per suas res mutare et molina construere et facere et habere quomodo eis placuerint et sibi suisque heredibus haberent illud cum vice de viis suis et facerent ex eo quod voluerint. et neque a nostris iudicibus, comitibus, castaldeis neque a quibuscumque actoribus nostre reipuplice quolibet tempore illa et eius heredes ex hoc quod ei sicut suprascriptum est concedimus habeant aliquam contrarietatem, set illa et eius heredes in perpetuum illud securiter habeant et faciant ex eo quod voluerint. Textum vero huius concessionis scribere precepimus te Aceprandum lebitam et scribam nostri sacri palatii anno nobis a Deo concessi principatus septimodecimo, mense septembri concurrente indictione duodecima. Cum autem ipsum preceptum ostensum fuit, dixit ipsa domna Gemma ut molinam in rebus suis de ipso loco Veteri construere fecisset et eas cum rebus suis de ipso loco dudum per firmam cartulam pro sue salutis anime optulisset in monasterio Sancte et individue Trinitatis quod foris hanc civitatem in loco Metiliano conditum est, in quo domnus Leo venerabilis abbas preest, in omni hordine et ratione sicut ipsa cartula continet et tunc non esset ei in memoria pro dandum in iamdicto monasterio suprascriptum preceptum. nunc autem ipsa domna Gemma, sicut ei placuit, sua bona voluntate, pro salutis anime sue dedit Iohanni monacho pro parte suprascripti monasterii iamdictum preceptum et optulit in eodem monasterio totum et integrum illud quod ipse domnus princeps ei ut suprascriptum est concesserat, quemammodum ipsum preceptum continere videtur cum vice de viis suis. ea ratione ut ab obitu ipsius domne Gemme in antea semper sit in potestate ipsius domni abbatis et successorum eius et partium suprascripti monasterii et liceat ipsum domnum abbatem et successores eius et partem ipsius monasterii de eo facere quod voluerint; et ipsa domna Gemma tribuit licentiam ut quemadmodum illa et eius heredes facere et habere debuerit secundum textum suprascripti precepti, ita ipse domnus abbas et successores eius et pars ipsius monasterii potestatem habeant facere et habere. et per convenientiam ipsa domna Gemma obligavit heredes suos semper defendere ipsi domno abbati et successoribus illius et partibus ipsius monasterii ipsum preceptum et integrum illud quod in ipso monasterio ut dictum est optulit ab omnibus hominibus, et tribuit licentiam ut, quando ipse domnus abbas et successores eius et pars ipsius monasterii voluerint, potestatem habeant illud per se defendere qualiter voluerint, cum omnibus muniminibus et rationibus quas de eo ostenderint. et si sicut superius scriptum est heredes ipsius domne Gemme non adimpleverint et illa vel heredes eius suprascripta vel ex eis quicquam remobere aut contradicere presumpserint, per ipsam convenientiam ipsa domna Gemma obligavit se et suos heredes componere ipsi domno abbati et successoribus illius et partibus suprascripti monasterii centum auri solidos constantinatos et sicut suprascriptum est adimplere. suprascripta vero ipsa domna Gemma fecit cum voluntate suprascripti domni nostri Gisulfi et Landolfi et Guidonis et Iohannis et Guaimarii filiorum suorum in quorum mundio est. quod autem superius disturbatum est legitur in iamdicto. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 309-311, Estratto da ALIM