Cartula scripta per Iohannem notarium in anno dominice incarnationis millesimo septuagesimo secundo, et tricesimo anno principatus ipsius domni nostri Gisulfi gloriosi principis, mense decembri decima indictione. Qualiter ante me Petrus qui dicitur Borda filius quondam Iohannis coniunctus fuerat cum suprascripto Petro filio Mauri, et ipse Petrus Borda clarificaverat se habere unam peciam de terra cum vinea et arboribus et canneto et saliceto et silba foris ac civitate in ipso loco Veteri prope suprascripto monasterio, quam dixerat esse per fines et mensuras iusto passu hominis mensuratas: de pede finis fluvio Veteri, inde mensurati passus viginti octo; a parte orientis passus nonaginta et duo; de capite erat latitudo passus quattuor; a parte occidentis finis terra cum vinea et arboribus ipsius Petri qui Astone dicitur et finis aliorum, et per totam ipsam partem erant passus centum quattuor. et sicut ipsi Petro qui Borda dicitur congruum fuerat, bona sua voluntate, per ipsam cartulam venundederat ipsi Petro Astoni integram suprascriptam terram cum vinea et arboribus et canneto et saliceto et silba per suprascriptas fines et mensuras, cum omnibus que intra eam erant cunctisque suis pertinentiis et cum vice de via sua. ea ratione ut semper esset in potestate ipsius Petri Astoni et heredum eius, et liceret illum et eius heredes de eo facere quod vellent, sicut ipsa cartula continet in qua ego meum nomen descripsi.

Source Fulltext: Codex Diplomaticus Cavensis, vol. 09, 349-349, Estratto da ALIM