+ In nomine domini nostri Iesu Christi. Anno ab incarnatione eius millesimo septuagesimo quinto et tricesimo tertio anno principatus domni nostri Gisulfi gloriosi principis, mense martio duodecima indictione. Coram me Rottelgrimo comite et iudice Romoaldus comes filius quondam Grimoaldi comitis coniunctus est cum Ademario presbitero monacho et abbate monastterii Beati confessoris Martini, quod constructum est foris hac a Deo conserbata Salernitana civitate in cacumine montis loco ubi Forma dicitur, et de ipso monastterio et omnibus rebus stavilibus ipsi monastterio pertinentibus medietas pertinet Guaiferio et Petro germanis filiis quondam Iohannis comitis et altera medietas Alfano filio quondam Petri comitis. et ipse Romoaldus clarificavit sibi pertinere medietatem de terra cum arbusto et castaneto et querceto in iamdicto loco in latere ipsius montis, et dixit totam ipsam terram esse per fines et mensuras iusto passu hominis mensuratas: a parte occidentis finis terram iamdicti monastterii sicut limes discernit, intra quam ipsum monastterium constructum est et passus triginta; a parte quasi meridiei similiter finis terram ipsius monastterii qualiter descendit per medium cristonem et passus ducentos septuaginta et duos; a parte orientis finis medium vallum et per eum mensuratas passus quadraginta et quattuor, et a conpletis ipsis passibus dimisso eodem vallo vadit in partem septemtrionis per medium limitem non tamen per totum passibus centum triginta et uno et coniungit in alium medium vallunculum, et deinde per medium ipsum vallunculum sicut revolvit passibus hoctoginta et duobus et coniungit in viam antiquam quæ nunc in usu non est, et deinde per ipsam viam vadit in partem septemtrionis mensuratis intra ipsam terram prope ipsam viam passibus centum quinquaginta et quattuor; ab ipsa parte septemtrionis passus ducentos sexaginta et quinque, qualiter ab ipsa via ascendit usque iamdictum priorem finem. et ibique presens ipse Romoaldus ostendit unum scriptum iudicii et dispositionis qualiter Iohannes comes fiius quondam Iohannis inter cetera quæ ipsum scriptum continet iudicaverat et disposuerat ut integra curtis eius ubi proprie a la Forma nominatur cum omnibus quæ intra eam erant cunctisque eius pertinentiis et cum vice de viis suis et cum muniminibus ex ea continentibus semper esset in potestate suprascripti Romoaldi ex parte matris consobrini fratris sui filii quondam prefati Grimoaldi comitis et heredum eius, et liceret illum et eius heredes de eo facere quod vellent, sicut ipsum scriptum continet quod per Grimoaldum notarium scriptum est vicesimo quarto anno principatus suprascripti domni nostri Gisulfi, mense nobembri quarta indictione, in quo ego meum nomen propriis subscripseram digitis. Et ut ipsum scriptum ostensum ac lectum fuit, iamdictus Romoaldus sicut ei placuit, sua voluntate per convenientiam, per hanc cartulam vendidit suprascripto Ademario abbati pro parte ipsius monastterii Sancti Martini integram medietatem quam sibi superius pertinere clarificavit de tota suprascripta terra per iamdictas fines et mensuras cum omnibus que intra ipsam medietatem sunt cunctisque eius pertinentiis et cum vice de viis suis et cum toto et integro quantum extra suprascriptas fines et mensuras in partibus orientis et septemtrionis suprascripto Iohanni comiti filio Iohannis ibique coniunctum pertinuit. ea ratione ut integra ipsa venditio qualiter super legitur sit semper in potestate ipsius abbatis et successorum eius et liceat illum et successores eius et partes ipsius monastterii de ea facere quod voluerint, et nichil ibidem vel coniunctum sibi ipse Romoaldus remanere dixit. et propter confirmationem huius venditionis ipse Romoaldus suscepit ab ipso abbate statutum pretium solidos tarenorum presentis Amalfitanorum monetæ quinquaginta in omni deliberatione. et per convenientiam ipse Romoaldus guadiam suprascripto abbati pro parte ipsius monastterii dedit et fideiussorem ei posuit Ademarium cognatum eius filium quondam Landolfi, et per ipsam guadiam obligavit se et suos heredes semper defendere ipsi abbati eiusque successoribus et parti ipsius monastteri integrum illud quod ei sicut suprasciptum est vendidit ab omnibus hominibus; et licentiam ei ipse Romoaldus tribuit ut, quotiens ipse abbas et successores eius et partes ipsius monastterii voluerint, potestatem habeant illud per se defendere qualiter voluerint cum omnibus muniminibus et rationibus quas de eo ostenderint. et si sicut superius scriptum est ipse Romoaldus et eius heredes ipsi abbati eiusque successoribus et partibus iamdicti monastterii non adimpleverint et suprascripta vel ex eis quicquam removere aut contradicere presumpserint, per ipsam guadiam obligavit se et suos heredes componere ipsi abbati eiusque successoribus et partibus iamdicti monastterii trecentos auri solidos constantinatos. suprascriptus vero Ademarius cognatus ipsius Romoaldi, quem ipse Romoaldus ut dictum est fideiussorem posuit, filius fuit iamdicti Landolfi comitis. Et taliter me iubente Grimoaldus notarius scripsit. S. + Ego qui super Rottelgrimus comes et iudex. S.

Source Fulltext: Codex Diplomaticus Cavensis, vol. 10, 91-94, Estratto da ALIM