+ In nomine domini nostri Iesu Christi. Anno vero ab incarnatione eius millesimo septuagesimo quinto et tricesimo tertio anno principatus domni nostri Gisulphi gloriosi principis, mense maio duodecima indictione. Ante me Siconem comitem et iudicem Petrus qui cognominatur Astone filius quondam Mauri coniunctus est cum Nicolao filio quondam Basilii aurificis, et ipse Petrus clarificavit se habere terram cum vinea et insiteto et canneto et saliceto et pomis foris hanc a Deo conserbatam Salernitanam civitatem in loco Veteri prope monasterium Sancti Leonis, ex qua ipse Petrus ostendit octo cartulas, quarum prima scripta per Landolfum notarium in anno tertio decimo principatus ipsius domni nostri Gisulfi, mense octubri octaba indictione. Qualiter ante me venerant mulier nomine Itta filia naturalis quondam Ferrandi clerici, relicta quondam Iohannis et Dilectus et Alfanus qui erant intra decem et octo annos, germani ac filii ipsorum Iohannis et Itte, et ipsi infantes dixerant necessitatem maiorem habere et fame mori et volebant vendere tres partes illorum de terra cum vinea quam habebant in ipso loco Veteri, quam dixerant esse per fines et mensuras iusto passu hominis mensuratas: a parte orientis finis aliorum et passus septuaginta octo; a parte septemtrionis finis medium vallone et per eum mensurati passus viginti septem; a parte occidentis finis aliorum et passus septuaginta octo; a parte meridiei finis aliorum et passus septem, et in medium per traversum passus viginti. quartam vero partem de iamdicta terra per suprascriptas fines et mensuras ipsa Itta sibi dixerat pertinere. et ipsi mater et filii ostenderant unam cartulam continentem qualiter Grima filia quondam Mauri qui dictus fuit Ungria, relicta quondam Ursi Atrianensis, et Taurus filius ipsorum Ursi et Grime ante presentia Ademarii comitis et iudicis venundederant ipsi Iohanni integram suprascriptam terram per iamdictas fines et mensuras, cum omnibus que intra eam erant cunctisque eius pertinentiis et cum vice de via sua et cum tribus cartulis ex ipsa terra continentibus, quarum una scripta per Iaquintum notarium duodecimo anno principatus domni Iohannis et septimo anno domni Guaimarii eius filii, mense martio octaba indictione et in ea subscripti Cicerus et Mirandus notarii; secunda scripta per Iohannem notarium anno vicesimo principatus domni Guaimarii mense aprili sexta indictione, in qua Arechisi et Iaquintus notarii subscripti sunt; tertia scripta per Iaquintum notarium anno vicesimo principatus domni Guaimarii, mense iunio sexta indictione et in ea subscripti Iohannes notarius et Iohannes, sicut ipsa cartula continebat scripta per Petrum notarium vicesimo octabo anno principatus domni Guaimarii et octabo anno principatus eius Capue et septimo anno ducatus eius Amalfis et Sirrenti et quarto anno suprascriptorum principatuum et ducatuum ipsius domni nostri Gisulfi eximii principis et ducis filii eius et tertio anno ducatus illorum Apulie et Calabrie, mense decembri quartadecima indictione, in qua ipse Ademarius iudex subscriptus erat. et cum ostense fuerant ipsi mater et filii secundum legem venundederunt ipsi Petro integram suprascriptam terram per iamdictas fines et mensuras, que erat ultra fluvium de ipso loco, cum omnibus que intra eam erant cunctisque eius pertinentiis et cum vice de via sua et cum ipsis quattuor cartulis de quibus in suprascripta prima cartula declaratum est. ea ratione ut semper integra ipsa venditio esset in potestate ipsius Petri et heredum eius et liceret illum et eius heredes de ea facere quod vellent, sicut ipsa cartula continet in qua ego meum nomen propriis subscripsi digitis. Secunda cartula scripta per Romoaldum notarium octabodecimo anno principatus ipsius domni nostri Gisulfi gloriosi principis, mense nobembri tertiadecima indictione. Qualiter Adelarius filius quondam Romoaldi ante testes coniunctus fuerat cum suprascripto Petro filio Mauri et ipse Adelarius clarificaverat se habere terram cum silba et vacuo in qua oriebatur aqua foris hanc Salernitanam civitatem in loco Veteri in monte qui Traverse dicitur, quam dixerat esse per fines et mensuras iusto passu hominis mensuratas: a parte septemtrionis finis medio vallone et per ipsam rem prope ipsum vallonem recte mensurati passus quadraginta nobem; a parte orientis finis ipsius Petri et passus septuaginta octo, et ab ipsis septuaginta octo passibus recte ibat in partem meridiei iuxta finem ipsius Adelarii passus sexaginta sex usque via que transversat per ipsum montem; ab ipsa parte meridiei finis ipsa via et passus quinquaginta; a parte occidentis erat finis Leonis cancellarii, quod ipse Adelarius ei venundederat, qualiter recte descendebat iuxta ipsam finem ab ipsa via in ipsa parte septemtrionis usque medio ipso vallone, passus centum sedecim. et sicut ipsi Adelario congruum fuerat, bona sua voluntate per ipsam cartulam venundederant ipsi Petro integram suprascriptam terram per suprascriptas fines et mensuras, cum omnibus intro se habentibus omnibusque suis pertinentiis et cum vice de ipsa via. ea ratione ut semper ipsa venditio esset in potestate ipsius Petri et heredum eius et liceret illum et eius heredes de ea facere quod vellent, sicut ipsa cartula continet in qua Iohannes et Landolfus notarii subscripti sunt. Tertia ... Quarta ... Alie vero quattuor cartule sunt ille de quibus in iamdicta prima cartula, que scripta est per ipsum Landolfum notarium, declaratum est. cum autem supradicte cartule ostense ac lecte fuerunt, ipse Petrus qui Astone dicitur, sicut ei congruum fuit, sua voluntate per convenientiam et per hanc cartulam venundedit ipsi Nicolao totas et integras suprascriptas terras per iamdictas fines et mensuras quemadmodum ipsi Petro vendite fuerant, sicut ipse prima et tertia cartule, in quibus ego subscriptus sum, et ipsa secunda cartula scripta per ipsum Romoaldum notarium continere videntur, et integram ipsam terram per iamdictas fines quam ipse Adelarius eidem Petro ut dictum est donaverat, cum omnibus que intra totas suprascriptas terras sunt cunctisque earum pertinentiis et cum vice de ipsa via que ducit per ipsum montem et de aliis viis suis et cum suprascriptis octo cartulis. ea ratione ut integra suprascripta venditio semper sit in potestate ipsius Nicolai et heredum eius, et ipse Nicolaus et eius heredes licentiam habeant de ea facere quod voluerint. et propter confirmationem huius venditionis ipse Petrus suscepit ab ipso Nicolao statutum pretium auri solidos centum duodecim, quorum quisque habebat tarenos quattuor ex moneta Amalfitanorum, in omni deliberatione. et per convenientiam ipse Petrus Astone guadiam ipsi Nicolao dedit et fideiussores ei posuit semedipsum et Radoaldum qui cognominatur Boccabitellum filium quondam Sergii Atrianensis, et per ipsam guadiam ipse Petrus obligavit se et suos heredes semper defendere ipsi Nicolao et illius heredibus integrum illud quod ei sicut suprascriptum est vendidit ab omnibus hominibus. sic tamen ut, quando ipse Nicolaus et suos heredes ipsum Petrum et eius heredes defensores de eo habere quesierint, dent eis suprascriptas octo cartulas iusta ratione salvas habendas diebus sexaginta, et per omnes vices ipse Petrus et suos heredes integrum illud quod ut dictum est vendidit eidem Nicolao et illius heredibus sicut suprascriptum est defendant, et post completos ipsos dies per omnes vices ipse Petrus et suos heredes cartulas ipsas salvas quales eis date fuerint ipsi Nicolao et illius heredibus reddant. et ipse Petrus tribuit ipsi Nicolao licentiam ut, quando ipse Nicolaus et suos heredes voluerint, potestatem habeant illud quod ipse Petrus ut dictum est vendidit per se defendere qualiter voluerint, cum omnibus muniminibus et rationibus quas de eo ostenderint; et si sicut superius scriptum est ipse Petrus Astone et suos heredes ipsi Nicolao et illius heredibus non adimpleverint et suprascripta vel ex eis quicquam remobere aut contradicere presumpserint, per ipsam guadiam ipse Petrus obligavit se et suos heredes componere ipsi Nicolao et illius heredibus centum auri solidos constantinatos et sicut superius scriptum est adimplere. Et taliter tibi Iohanni notario scribere precepi. S. + Ego qui supra Sico comes et iudex.

Source Fulltext: Codex Diplomaticus Cavensis, vol. 10, 109-113, Estratto da ALIM