Wi Jan graue van Holland van Zeland ende here van Vriezeland maken cont ende kenlic allen den ghenen, die desen brief sullen zien jof horen lesen, dat wi hebben beuolen ende beuelen met desen brieue haere Wlfarde van Barsle here van Zandenborg onsen ghetrowen man ende onsen ruddre jntenemene alle onse renten jn Holland, in Zeland, in Vrieze land ende waer dat si gheleghen siin, ende al onse verual ende al onse upcominghe, wane dat si comen moghen jof verscinen moghen, voer alsulc goet, als hi vor ons vtgheleit heuet ende noch voer ons vtligghen sal te goeder rekeninghe. Ende dat hi in allen sticken, die hir voerscreuen siin, bliuen sal. Ende dat wine daer niet vtdoen en sullen voer die tiit, dat wi hem ghenouch ghedaen hebben van alsulken goede, als hi voer ons vtgheleghet heuet ende noch vtlegghen sal te goeder re keninghe , als voerscreuen es. Ende omme dat wi hem dit vast willen houden ende ghestade, so hebben wi hem dese lettren ghegheuen, bezeghelt met onsen zeghele vtanghende. Jn kennessen ghegheuen in ons Heren jaer, als men scriuet dusent tveondert neghentich ende zeuene, des anderdaghes na sente Phi lips dagh ende sente Jacobs, apostelen, die men heet Meyedagh. Het zegel verloren.