ȬHȬeinricus miseracione divina Ratisp(o)n(ensis) ecclesie episcopus universis abbatibus, prepositis, decanis, plebanis, provisoribus ecclesiarum per Rat(isponensem) :I civitatem et dyocesim constitutis ad quos presens sciptum pervenerit salutem in domino. Quoniam ut ait apostolus, omnes stabimus ante tribunal Christi recepturi prout in corpore gessimus, sive bonum fuerit sive malum, oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu colligere valeamus in celis firmam spem fiduciamque tenentes, quam qui parce seminat, parce et metet, et qui seminat in benedictionibus de benedictionibus et metet vitam eternam. Cum igitur hospitale sancte Katherine in pede pontis Rat(isponensis) ultra facultates suas pauperum et egenorum sit multitudine adeo pregravatum, quod et idem pauperes sine fidelium amminiculo et succursu non valeant sustentari, ut et vos pecata vestra elemosinarum expiacionibus redimatis, vobis in remissionem iniugimus peccatorum, ut nuncios honestos, non questuarios, dicti hospitalis ad vos pro colligendis elemosinis venientes benigne recipere ac favorabiliter pertractare curetis propter domini principaliter et nihilominus nostri causa. Iniugentes vestris subditis in remissionem peccatorum suorum, ut de bonis a Deo sibi collatis pias eis elemosinas conferant et ad hoc instanter eos vestris exhortacionibus efficaciter inducatis. Nos enim indulgencias, quas a Romanis pontificibus vel aliis seu nostris predecessoribus obtinuisse noscuntur, ratas habemus. Quin et omnibus corde contritis et confessis ad eundem locum suas elemosinas conferentibus, XL dies criminalium et LXXX venialium de iniuncta sibi penitencia misericorditer relaxamus. Inhibemus districtius sub pena suspensionis, ne cum dictis indulgenciis quemquam questuarium in vestris ecclesiis admittatis vel predicare aliud permittatis, quam exposicionem indulgenciarum hospitalis prenominati. Inhibemus etiam sub pena suspensionis ab officio, ne aliter ecclesie, monasterii, hospitalis sive capelle peticio admittatur in vestris ecclesiis presentibus nunciis nostre ecclesie kathedralis, sed nostra procedat peticio nunciorum. Dat. Rat(ispone) anno domini Mo CC LXXVIII, sexto nonas marcii.