In nomine domini Amen. Quoniam non nostra, sed ipsius creatoris domini nostri sunt omnia quae habemus, necesse necnon dignum est, ut abdicantes et renunciantes tem-:|poralibus ipsi domino terrena pro perpetualiter durabilibus predestinemus, ita ut post finem huius vite labilis eterne retribucionis premium animeque salvacionem concedente domino perennitus consequimur. Notum sit ergo universis Christi fidelibus presentem litteram visuris et audituris quod cum ego Rugerus de Ætelbrůnne civis Ratisponensis emissem pro octuaginta libris denariorum Ratisponensium predium, hoc est curiam in Læuterchouen prope Reut sitam, solventem annuatim siliginis decem schaffas, avene quinque schaffas, undecim solidos denariorum Ratisponensium, caseos viginti, anseres quinque, pullos decem et duos centenarios ovorum. Dedi pure deputavi, que nomine testamenti eandem curiam hospitali sancte Katerine in pede pontis Ratispone cum omnibus suis pertinenciis, quesitis et inquirendis post mortem meam et Alheidis uxoris mee servituram et perpetuo possidendam proprietatis titulo libere sub hac forma, quatenus magister hospitalis et fratres eiusdem proventus ipsius curie collectos ad granarium hospitalis integraliter ducere debeant, et deinde ad domum vel ad quemcumque locum voluero sine meo dispendio quolibet presentare. Porro si hoc non fecerint et nata in curia omnia sive bladum mihi non presentaverint per totum sicut nascitur et provenit, habeo facultatem liberam et auctoritatem donandi et legandi ipsam curiam cui volo. Quandocumque autem ego Rugerus decesso de hac vita, vel si uxorem meam Alheidim me premori contingerit, tertia pars proventuum prelibate curie hospitali prelibato et infirmis in eodem degentibus cedet liberaliter eorum usibus adtributa. Et ipsi fratres illius tunc defuncti, qui prior premoritur anniversarium sollempniter celebrabunt. Dantes de ipsa parte tercia proventuum tunc vacante, quinque solidos denariorum Ratisponenesis monete de quibus die illo potus et cibariorum sicut tunc haberi poterit infirmis et languentibus consolacio ministretur, et fratribus triginta denarii pro privata gratia erogetur. Persona siquidem altera successive mortua curia sepedicta cum expressis proventibus et omnibus suis iuribus et adtinentiis sine omni casu hospitali et infirmis sancte Katerine pretaxatis vacabit eorum possessionibus et usibus perpetualiter servitura et ipsi scilicet magister hospitalis et fratres, qui tunc pro tempore fuerint anniversarium nostri amborum defunctorum, annis singulis in uno die, hoc est in feria tercia post Michahelis proxima, communiter et perpetualiter celebrabunt. Dantes pro infirmorum consolacione cibariorum et potus libamine decem solidos denariorum et fratribus pro speciali relevacione denarios sexaginta. Si siquidem in anniversario nostro celebrando, sicut est statutum, se neglexerint, duodecim illi solidi qui pro infirmis et fratribus dari deberent, tenentur mox octo fraternitatibus pro animarum nostrarum dari remedio illo anno. Habent quoque magister et fratres hospitalis sepedicti iam et in presenti iurisdictionem facultatem et potestatem plenariam de sepedicta curia instituendi et destituendi, tractandi et ordinandi, locandi et privandi pro ipsorum beneplacito, sicut de aliis suis proprietatibus et possessionibus huc usque habitis et possessis. Verumtamen si peticionem meam pro aliquo amico meo scilicet colono vel villico eidem curie preficiendo et locando effundere decrevero, admittere debent et per aliis petentibus exaudire. Preterea si magistro et fratribus hospitalis placuerit, curiam ipsam culturis et araturis propriis excolere, tenetur mihi Rugero et Alheidi uxori mee omnes bladi proventus cum aliis serviciis et pertinenciis omnibus de memorata curia ad nostrum vivere integraliter nobis annis singulis presentare sub omni forma et condicionibus expressis superius et notatis, nisi grando vel inpedimentum aliud communiter legitimum hoc intercipiat vel avertat. Si enim hoc accidit et emerserit, tenentur ex tunc saltim ipsi fratres dimidietatem proventuum sive fructuum dare et off[e]re mihi et uxori mee, quos tunc colligunt, sicut deus ipsis et michi donaverit et permisit illa vice (?). In recognicionem quoque ipsius donacionis sive testamenti dedi et preordinavi in presenti de dictis curie proventibus absolute scaffam unam avene ad cervisiam infirmis miseris depraxandam et triginta denarios ad augendum candelam perpetualiter, que ante corpus Christi infirmorum communicacione solet honoriffice deportari. Et ut igitur huius testamenti perordinacio ex parte mei et uxoris mei edita et expressa rata et per omnia irrevocabiliter conservetur et a magistro et a fratribus mihi et uxori mee statuta superius de presentibus usque ad mortem meam et uxoris mee et post obitum nostrum irrefragabiliter in perpetuum observentur, placuit presentem litteram sigilli universitatis civium Ratisponensium et ipsius hospitalis sigilli robore communiri. Sunt quoque ipsius testamenti et tractatus tocius consumacionis testes: frater Otto magister hospitalis sub cuius regimine et procuracione factum presens est contractum, dominus Vlricus de Gaimersheim, dominus Heinricus de superiori monasterio, frater Chvnradus de Hærtinge, frater Fridericus de Sneberch, frater Albertus de Stauffe, Laici vero dominus Levpoldus dictus Igel, dominus Rugerus de Cappella, dominus Karolus de Aw milites, Fridericus Veselarius, Hærtwicus Weintingerius, Fridericus Nevmburgerius, Otto Wollarius, Grimoldus, Goezwinus in foro, Hærtwicus, Dietmarus Chratzerius, Chvnradus Dens, Chvnradus Pollex, Otto Vaulwiserius, Heimo, Heinricus ante suburbium, Heinricus de Ingolstat, Chvnradus Teuffentalerius, Rupertus Estas, Dietmarus Ætelbrȅnnær, Chvnradus Weitoldus, Chvnradus dictus Chvnigesueldær et alii quam plures. Actum anno domini Mo CCo LXXXo octavo in die beati Laurentii martiris et levite. Quarto ydus augusti.