Wir Vlrich von Abensperch vnd Vlrich von dem Stayne veriehen an disem brief vnd :I tven chvnt allen, di disen brief ansehent vnd hoerent lesen, daz wir haben angesehen den dienst, den wir haben gehabt lange, vnd noch haben, von den beschaiden læuten, hern Otten von Chrandorf dem vitztum vnd Hiltwein sinem brueder, vnd haben in gegeben di aigenschaft an dem guet datz Mutzhart vnd Sauloh daz si chauften, datz den /Otlingern vnd von vns ze lehen heten vnd daz wir noch vnsern erben fuerbaz dehain ansprach nach derselben aigenschaft haben; vnd di vorgenanten brueder, Otte der vitztum vnd Hiltwein sin brueder, immer mer daran vngerret beleiben von vns vnd von vnsern erben, haben wir in disen brief gegeben versigelt vnd veruestent mit vnsern insigeln. Daz ist geschehen datz Regenspurch, da von Christes gebuert waren zwelfhundert iar vnd an dem andern vnd nevnczigistem iar, an dem pfintztach vor sand Gregorii tach.