Ich Walther Mvschopf, bvrger ze Regenspurch, vergih an disem gagenwurttigen brief :I vnd tvn ovch chvnt allen, die in sehen oder h/oren lesen, daz ich brvder Chvnraden, dem meister des spitals ienhalben prvkke, geheizzen vnd gelobt han, daz ich sein gewer welle sein mit dem rehten des werdes, der gelegen ist niderthalben der siechen, den der vorgenant meister von dem spital wider hern Otten avf der Wag gechavft hat ze dr[e]in leiben, die ich an demselben werde het von mines herren genaden des bischofs mit allem dem reht vnd ich daran gehabt han. Daz dicz also stæt beleib vnd vnzebrochen, han ich im disen brief dar/vber gegeben ze einem vrchvnde versigelten mit meinem insigel vnd mit den zevgen, die dabei gewesen sint, daz sint die: her Chvnrat der schvltheicz , her Karl der Chratzær, Hærtweich der Mvschopf, Vlreich der Sallær bvrgerschreiber, Leo der S/vzze, Otto der vorsprech vnd ander zevg mer. Daz ist geschehen, da von Christes gebvrtte warn drevzehenhvndert jar des montages an sanct Pavls tag des becherærs.