Ich Vlreich der Beschorn vnd ich mair Chunrat, ped ze Pf/affelstain, vnser hawsfrawn vnd all vnser erben veriehen vnd t*un :I chunt allen den, di den brif ansehent oder h/ornt lesen, daz vns vnser genediger herr, her Fridreich der Slaykch, zu den zeiten maister dez spitals sand Katrein an dem f/uzz der prukk ze Regens(purch) vnd der conuent doselben lazzen habent iren aigen weingarten ze Pf/affelstain, genant di Pewnt, daz wir den innhaben vnd pa*wen s/ullen von liechtmess, di schirst chumbt, darnach zwai gantze*w jar, di nochst nacheinander chomment, mit der beschaiden, daz wir in j/arleich darauz geben vnd dienen s/ullen yeden dritten emer, als vil weins an dem vorgenanten weingarten wirt, on allen iren schaden. Wir s/ullen auch in j/arleichen einen zuber weinpir darauz geben den siechen, swann man erst an dem weingarten list; vnd ob vnser ayner seinen tail vor dem andern l/as, dannoch sol man den zuber von peden tailen f/ullen on all widerred. Wir s/ullen auch j/arleich all p/oz stokch auz dem weingarten r/awtten vnd gut stokch darein schiezzen on allen iren schaden; vnd wir s/ullen auch j/arleichen in ir stift chommen, swann si vns darein pietent vnd der stifft recht tun als ander ir weinz/url vnd s/ullen in j/arleich einen hengelp/uschel geben on all widerred. Vnd swelhez iars wir in den vorgenanten zwain jarn nicht gut pawl/aut w/arn oder daz wir ez sust verworchten, so habent si vollen gewalt vns ze uerchern mit andern weinz/url, daz wir dhain ansprach noch vodrung hincz in noch hincz irem vorgenanten weingarten nicht haben noch gewynnen s/ullen, noch enm/ugen, weder mit gaistleichem noch werltleichem rechten noch on recht, noch anders yemant von vnsern wegen. Vnd ob wir in nicht allez daz st/at hielten vnd volf/urten, swaz an dem brief verschriben ist, swelhen schaden si dez nement, den s/ullen wir in abtun vnd widerchern. Vnd si m/ugen auch dez allez von vns vnd von aller vnsrer hab, besucht vnd vnbesucht, bechommen, mit recht oder on recht, swann vnd swie si wellent, vnd swann di vorgenanten zwai jar auzchoment vnd vergangen sind, so ist in ir vorgenanter weingart vnd swaz darzu geh/ort, besucht vnd vnbesucht, von vns ze durchslecht ledig vnd loz worden, daz si den f/urbaz lazzen m/ugen swem si wellent, daz wir f/urbaz darauf noch darnach nicht mer ze uodern noch ze sprechen haben, noch gewynnen s/ullen noch enm/ugen, weder mit recht noch on recht, noch anders yemant von vnsern wegen in dhainerlay weis; vnd vmb swew wir dar/vber mit in chriegten oder rechten, daz s/ullen si allez behabt haben vnd wir verlorn haben. Daz in daz allez also st/at vnd vnzebrochen beleib, dar/vber zu einem vrch/und, geben wir in den brif versigelt mit hern Hansen dez Chembnater, zu den zeiten richter in der vorstat ze Regens(purch), insigel, daz er an den brif gelegt hat nach vnsrer vleizzigen pet, der sach zu einer gezeukchn/uzz, im vnenkolten vnd on schaden der herrenvogtey vnd steur, darvnder wir vns vnuerschaidenlich verpinden mit vnsern trewn st/at ze halten, swaz an dem brif verschriben ist. Dez sind gezeug: Chunrat der Wuczenhofer, Chunr(at) St/or vnd Ott der hofmaister. Daz ist geschehen nach Christez gepurtt dreuczehenhundert iar vnd in dem drewvndsibenczigisten iar an sand Pawls abent als er bechert ward.