Ich Winhart von Chamerberch vnd mein hausvrowe Agnes, vnd alle mein erben veriehen vnd t/vn chunt allen den, die disen gagenburtigen prief ansehent oder h/orent lesen, daz wir :I vnser rehtez aigen vnd vnser g/vt da cze Sehouen haben verchauft den pr/udern vnd dem spital meiner vrowe sant Katherein an dem f/uzz der prukch ze Regenspurch drei h/of da cze Sehofen vnd seczzehen hofstet daselben, ein swoich lehen, ein holcz vnd ein wismat heizet di S/unnaw vnd vier tagwerch wismates, vnd die hirtschaft vber daz dorf da cze Sehouen, vnd vier tagwerch wismates pei Ma'nchingen, vnd das dorfgeriht da cze Sehouen; daz lehen ist von dem herczogen von peiern vnd ellev dev reht, vnd allez daz g/vt, daz wir da cze Sehouen heten, bes/vchz vnd vnbes/uchz, gepauenz vnd vngebauenz, ze dorf vnd ze velte, ze wazzer vnd ze stein, ze holcz vnd ze stochk, vnd diselben g/vt vnd reht die vor geschriben sint, habn wir den genanten pr/udern vnd dem spital von Regenspurch verchauft f/vr ein vreiez ledigez eigen vmb achzich pfunt Regenspurger pfenning der si vns schon vnd erleichen verriht vnd gewert habent, vnd darvmb so schul wir noch kein vnser erbe, noch kein vnser affterchunt ewichleichen nimmer mer chain reht noch chain ansprach nimmer mer gehaben, noch gewinnen; auch so pint wir uns darz/v mit disem gagenburtigen prief, daz wir die vor geschriben g/vt vnd reht sch/ullen versprechen vnd verantwurten, vnd rechvertigen an aller der stat, da si werdent angesprochen als eigens reht ist, vnd des landes gewonheit, do daz egeschriben g/vt inne leit. Vnd ob daz wa'r, daz die egnanten pr/uder von dem spital da cze Regenspurch des keinen schaden na'men, den schul wir in abt/vn an alle widerrede vnd an allen chr/ichk, doch so schol man wizzen daz, daz her Winhart von Chamerberch einen hof noch hat, da cze Sehouen der dem Schefpechen stet vnd ein hofstat die der Widenman daselben von im ze lehen hat, dev andern reht vnd daz ander eigen allez samt, daz her Winhart von Chamerberch vnd sein hausvrowe, ver Agnes, vnd alle sein erben dacz Sehouen heten, daz ist der pr/uder vnd des spitals von Regenspurch rehtez eigen ewichleichn immer mer. Daz dicz allez also sta't vnd vnczeprochen beleib, von vns vnd von allen vnsern erben vnd affterchunden, dorvmb, so habe wir vnuerscheidenleichen z/v vns ze porgen geseczet Arnolden von Chamerberch, Hiltpranden von Chamer, Vlreichen den Judman von Gerolfingen, Ludweigen von Sandczell, die alle vier vnverscheidenleichen z/v vns habnt gelobt, daz ez allez werde behalten als vor geschriben stet, vnd swaz ie an einem abge, daz schol der ander volf/uren an alle widerred vnd an allez gefa'rd. Daz daz allez also sta't ewichleichen vnd vnczeprochen beleib, dorvmb, so habe wir gegeben disen gagenburtigen prief versigelten mit vnsers selbes insigel vnd mit der vier porgen insigel, die vor geschrieben sint. Des sint gezevg: Eberhart der Schillwacz, Albreht der Tegerpech; Hiltwein von Chrondorf, Albreht der K/olner, Seifrit von Geisenvelt, R/uger von Ernaw, Vlreich der alt, Vlreich der Churcz, Heinreich der Leidgeb, Vlreich von Pertershausen vnd anderr vrumer l/aut gen/vch. Daz ist geschehen da von Christes gep/urt waren tausent iar, drevhundert iar vnd sehs iar an sant Marei Magdalen tag.