Wir graf Hainreich, graf Perngers svn von Lensperch, veriehen vnd tvn chvnt allen den, di disen gagenb/vr:Itigen brief ansehent oder h/orent lesen, daz durch div lieb Gots vnd durch vnsers lieben vaters sel willen, graf Perngers, dem Got genad, lazzen alliv div ansprach vnd alliv div vadrvnge, vnd alliv div reht div wir heten oder haben scholden, oder haben m/ohten an den g/uten vnd an den h/ofen dar ze Lauterchofen, ze SeySeybritsdorf vnd ze Leibolfingen, div vnser lieben vater graf Pernger vnd mein vetern Werhart vnd Hainreich dem spital meiner frawen sand Katrein gegeben vnd geaigent habent, diselben vorgeschriben g/vt vnd h/of, der verzeich ich mich vnd aige siv dem egeschriben spital ze Regenspurch, daz ich noch dehain mein afterchom auf die vorgeschriben hof dehain ansprach noch dehain vodervnge, noch dehain reht nimer mer haben schol noch haben wil, noch nimer mer geewinne. Wan di egenanten drei h/of, Lauterchofen, Seybritstorf, Leybolfingen, von alten dingen her von vns vnd vnsern vodern lehen waren, da von nam ich von den spitala'ren ze Regenspurch driv pfvnt Regenspurger pfenninge, der si mich schon vnd erleich gewert habent, vnd darvmb so aigen ich inz vnd han inz geaigent ledichleichen vnd vreileichen, daz ich dehain ansprach noch dehain reht nimer mer gewinne, gewinnen schol ewichleichen vnd div vorgeschriben gvt, ze Lauterchofen, ze Seybritstorf vnd ze Leibolfingen, schvlen si haben vnd habent siv auch fridleich vnd vreileich, ze veld vnd ze dorf, besvhtiv vnd vnbes/vhtiv, gepavniv vnd vngepavniv, ze holcz vnd ze wazzer, ze stoch vnd ze stain, daz wir noch dehain vnser afterchom in dehain lait noch dehain ansprach noch dehain reht nimer mer gehaben noch gewinnen vnd wellen siv auch fvrbaz ime mer versprechen vnd beschermen vnd f/vdern an aller der stat, da di egeschriben spitalaer von Regenspurch vns sein ermanent, da welle wir vnd schvlen in vor sein mit worten vnd mit werchen mit ganczen trewen. Daz daz also staet vnd vnzerbrochen beleib, von vns vnd von vnsern nachcomen hab wir in disen gagenb/vtigen brief gegeben ze einem vrchvnde mit vnser selbes insigel versigelten. Des sint gezwg: Gaitel der Vrei, der derselben sache schiedman vnd taidinger was, Chvnrat der Eibetche, hainreich von Ch/vngesawe, Hainreich der Holczlaimaer, Hainr(eich), herren Wolfhats svn von Lenwerch, Vlreich der Paennel vnd der Lavrencz von Straubinge, Chvnr(ad) der En, Vlreich de Chlafschineche vnd anderr frvmer laeut vil. daz ist geschehen ze Stravbinge do von Christes geburt waren drutzehenhvndert iar vnd sehs jar an sand Vrbans tag des heiligen martraes.