Ich Hainreich der Snoper, burg/ar z/u Regens(purch), vergich vnd tvn chvnt allen den, dy den brif ansehent oder h/ornt lesen, das mir her :I Marttein der Gebenpekch, an der zeit maister des spitals zu sand Katrein, an dem fvzz der prukk z/u Regens(purch), vnd gemainlich dy samnvng dezselben spitals, irn vnd dezselben spitals aigen weingartten, genant der Per, der gelegen ist an dem Stainweg, z/u nochst an Chvnrat des Prvnn/ar weingartt, mit allen rehten, ern vnd n/utzzen dy darzu geh/ornt, rechtt vnd redleich z/u rechttem leibting, verlihen vnd lazzen habent auf zwen leib, auf mein obgenantz Hainreich dez Snoper leib vnd auf jvnchfrawen Chlarn, meiner tochtter leib, fridleich vnd freYlich ynn z/u haben, zu besitzzen, zu niessen vnd zu n/utzzen, alz leibtings reht ist, alle dy weil vnd wir vorgenantt zwen leib paid leben oder vnser ainer, mit der beschaiden, daz wir obgenantt zwen leib oder ainer der dann lebtt, in vnd dem vorgenanten spital alle jar j/arlich davon geben vnd antwurtten s/ullen, ye den dritten emer weins vor dem pyet vnd j/arleich zwen emer weins voraus von vngetailtem wein, allez an alle ir m/u vnd sch/aden; auch also, daz wir den vorgenanten weingartten alle jar j/arleich, wesenleich vnd pa/wleich haltten vnd pawen sch/ullen mit aller arbaitt dy darz/u geh/ort, alz guter pawla/wt vnd pawes reht ist. W/ar aber, daz wir den vorgenanten weingartten nicht wesenleich vnd pa/wlich hieltten, alz reht ist, so sein wir zu hant darnach zu durchsl/achtt, geuallen von allen den rehten dy sy vns auf dem vorgenanten weingartten verschriben vnd lassen haben, daz wir vorgenantt zwen leib noch nyemant anders von vnsern wegen dann f/vrbas, darauf noch darnach, nichtz mer zu vodern noch zu sprechen haben, noch gewinnen sch/ullen, noch enm/ugen, in dhainer weis. Wir vorgenantt zwen leib haben auch vollen gewalt vnsrew reht, dy sy vns auf dem vorgenanten weingartten verschriben habent zu verchauffen vnd zu versetzzen, wenn vnd wem wir wellen, an alle irrvgd vnd hindern/uzz, vnd schol auch daz geschehen mit eins maisters, dez egenanten spitals willen vnd g/vnst, doch vnenkolten in vnd dem egenanten spital an irn rehten, dy sy auf dem vorgenanten weingartten habent; vnd wann wir egenant zwen leib, ich Hainr(eich) der Snoper vnd Chlar mein tochtter, paidew nicht mer sein vnd von todes wegen abgen, da Got lang vor sei, so ist in vnd irm obgenanten spital, vnd irn nachkommen, der vorgenantt weingartt mit aller zugeh/orung zu hant nach vnser paider tod, zu durchsl/achtt ledig vnd los worden, an alle ansprach vnd widerred. Das dem vorgenanten spital vnd dem meister dezselben spitals, vnd sein nachkommen, daz allez also st/at vnd vntzerbrochen beleib, dar/vber z/u einem vrch/und gib ich, obgenanter Hainreich der Snoper, in den brif besigelten mit dez erbergen meins richter insigel, hern Hannsen dez Gvmprehtz, an der zeit Schultheizz z/u Regens(purch), daz er an den brif gelegtt hat nach meiner fleizzigen pet, der sach z/u einer gezewkchn/uzz, im vnd sein erben vnenkolten vnd an schaden, darvnder ich mich mit mein trewen verpind, st/at zu haben waz an dem brif geschriben stet. Vnd dez allez sind zewgen: Chvnradus, schreib/ar dez egenanten spitals, Liebhard, an der zeit probst daselb vnd Chvnrad der Erdappfel, gesezzen an dem Stainweg, burger in der vorstat z/u Regens(purch) vnd ander erberg la/wt. Daz ist geschehen nach Christy gep/urtt drewtzehenhvndert jar vnd in dem sechsvndnewntzigistem jar dez montags vor sand Johannes tag z/u svnnwentten.