Ich Ch/unrat der Erdopfel, weilent gesezzen an dem Stainweg in der vorstat zu Regenspurch, mein hausfraw vnd all vnser erben, :I veriehen offenlich mit dem brief vmb alle di ansprach vnd voderung di wir geahbt haben hintz dem spital sand Kathrein an dem fuezz der prukk zu Regenspurch vnd hintz irem hof, genant der Harthof, vnd von Chunrat irs mairs wegen der vor auf demselben hof saz vnd vmb all ander sach vnd voderung, di wir hintz dem vorgenanten spital gehabt haben vnd mainten zu haben, nichtz ausgenomen, vmb daz alles haben wir mit veraintem g/utem willen einen slechten gantzen hindergankch getan hinder vnser lieben frewnd Hainreich den Snoper, burger zu Regenspurch vnd hinder Liebharten vnd Zachereis, an der zeit pr/obst des vorgenanten spitals, vnd di habent vns auch fur all sach vnd ansprach ausgesprochen vnd geschaiden von dem vorgenanten spital, ein sogetan g/ut des vns wol ben/ugt vnd dez wir gentzlich verricht vnd gewert sein, als verer dez wir hintz dem vorgenanten spital noch hintz aller seiner hab von dhainerlai sach vnd handlung wegen nichtz ausgenomen, dhain ansprach noch voderung nicht mer haben noch gewynnen sullen noch enm/ugen, weder mit geistlichem noch werltlichem rechten noch on recht, chlain noch gros, furbas nymmer mer noch anders iemand von vnsern wegen, in dhain weis. Vnd daruber ze vrchund geben wir dem vorgenanten spital den brief besigelten mit hern Hannsen des Gvmpprecht, zu den zeiten schultheiss zu Regenspurch, insigel, daz er an den brief gelegt hat nach vnserer vlleizzigen pet, der sach zu einer gezewgn/uzz im vnd seinen erben vnenkolten, darvnder wir vns verpinden mit vnsern trewn st/at zu halten wazz an dem brief verschriben ist. Daz ist geschehen nach Christi gep/urtt drewzehenhvndert jar vnd in dem sibenvndnewntzigistem jar an sand Erhartz abent des heiligen bischof.