Ich Vlreich der Trainer, burger zu Regenspurg, mein hausfraw vnd all vnser erben, veriehen offenlich mit dem briefe, daz wir Vlreich :I dem Pl/ankchel, gesezzen an dem Stainweg, seiner hausfrawn vnd allen iren erben, lazzen haben zu ainem rechten zinslehen vnsern halben akcher, der gelegen ist am Stainweg, vnd stozzt auf den se ze nahst hinden an dez Prewen hof, vnd aus demselben halben akcher man i/arlich zu zins gibtt, ain halb pfvnt pfeffer dem gotzhaus zu Ror mit allen eren, rechten vnd n/uzzen, als er vns anchomen ist von Chvnrat dem Chalbflesch, also haben si den recht vnd redleich bestanden, mit der beschaiden, daz si vnd all ir erben vnd nachkomen vns oder wer den brief, den wir von in haben, ynn hat vnd furbringt, alle iar i/arleich davon zu zins geben sullen drey schilling der langen Regenspurger pfenning, di dann gib vnd g/ab sind zu Regens(purg) in der stat, ie auf sand Haymerams tag on allen abgankch, darzu sullen si auch alle iar i/arlich ausrichten daz vorgeschriben halb pfunt pfeffer, daz gein Ror daraus geh/ort, alles on all vnser sch/aden, daz si dez i/arlich nichtz sol irren, landes vrlewg noch landes geprest, noch dhain ander sach, taten sy dez nicht vnd welhes iares vnd als offt si sa/wmig daran w/aren, so sullen si vns daz allez ausrichten vnd geben mit der zwispild nach purkchrecht, vers/azzen si vns aber di zwispild auch, welhen schaden wir dez allez nemen, dez m/ugen wir mit sambt dem zins vnd der zwispild von in vnd von aller ir hab, besucht vnd vnbesucht, bechomen mit dem rechten wann vnd wie wir wellen. Si habent auch vollen gewalt irew recht an dem vorgenanten halben akcher vmb ir notdurft zu versetzzen oder zu verchauffen wem si wellent, daz wir noch vnser nachkomen si daran nicht engen noch irren sullen, noch enm/ugen, doch vns vnd vnsern nachkomen on schaden an vnserm vorgenanten zins; vnd ob wir furbas daruber mit in kriegten oder rechten, mit geistlichem oder werltlichem rechten, oder on recht, daz habent si behabt vnd wir verlorn. Daz in oder wer den brief von irn wegen ynn hat vnd furbringt, daz allez also st/at vnd vnzebrochen beleib, daruber ze vrchvnd geben wir in den brief besigelten, ich obgenanter Vlrich der Trayner, mit meinem insigel fur mich, fur mein hausfrawn vnd fur all vnser erben. Der sach sind teidinger gewesen: Hainrich Snoper, Vlrich Pappenheimer, Perchtolt Mukkenstainer vnd Vlrich vnser weinzurl, vnd anderer erberger la/ut gen/ug. Daz ist geschehen nach Kristi gep/urtt drewzehenhvndert jar vnd in dem na/wnvndnewnzigistem jar an sand Mathias tag dez heiligen zwelfpoten in der vasten.