Ich Chvnrad der Pappenhaimer zu K/arrein, mein hawsfra/w vnd all vnser erben vnd nachkomen bechennen vnd t/un ch/vnt /offenbar mit dem brief :I allen den, die in ansehent, h/orent oder lesent, daz mir mein genadiger herr Liebhartt der Prettpekch, an der zeit maister dez spitals sand Kathrein, an dem fuezz der pruchk zu Regenspurch, vnd gemainkchleich die samung doselben nach rat, willen vnd gunst irer gen/adigen herren von dem kor vnd von dem rat der stat zu Regenspurg, lazzen haben iren vnd dez spitals aigen weingartten der gelegen ist zu Karrein, der da stozzet an den spital/ar vnd den weilent vor mir gepawt hat Wollfhart der Fragn/ar, burger zu Regens(purch) auf mein ains leibes leben, fridleich vnd freileich, inn zu haben, zu wesitzen, zu niessen vnd zu nutzen, alz leibtings recht ist, all die weil vnd ich obgenanter Chvnrad der Pappenhaima dann leb, mit der weschaiden, daz ich dem obgenanten spital aller iar iarleich davon dienen, geben vnd mitailen schol ie den dritten emer weins alz vil dann weins an dem egenanten irem weingarten wirt vnd auch iarleich vor dem piet an all ir m/ue vnd schaden. Si schullen mir auch aller iarleichen geben ne/wn fuder mistz vnd sullen mir die f/uren fur den weingartten wo er mir aller gelegenleichen ist, an all mein m/ue vnd schaden. Ich sol auch denselben mist in dhainerlai weis anders verchvmern noch furen, dann daz ich in an den wrgeschriben weingarten tragen sol trewleich an gev/ar. Mir hat auch der maister die genad getan vnd mich damit furgesehen, daz er mir daz iar hewr geben hat einen zentten holtz vnd furbaz nimmer, so sol ich obgenanter Chvnrad der P/appenhaimer in vnd irem spital den vorgenanten weingartten pewleichen halten, wesenleichen stellen mit mist tragen, mit stekken, mit erd tragen, mit lesen, mit pietlon vnd mit aller arbeit svmer vnd winter nichtz auzgenomen an gev/ar, alz paws vnd guter pewlewt recht ist, an all ir m/ue vnd schaden. Si schullen vnd m/ugen auch iarleichen in iren obgenanten weingartten senden, vir erberg man, die dy arbeit erchennen, daz si den weingartten schawn vnd schatzen, ob ich dem spital hilfleich vnd nutzleich sei. Vnd welchs iars sich erf/und, daz ich den vorgenanten weingartten nicht pawleich vnd wesenleich hielt, stelt vnd verw/as mit allen sachen alz vor verschriben ist, so pin ich zu hant darnach abgeschaiden von meinem vorgenanten leibting vnd von allen meinen rechten, alz ferr daz ich noch anders yemant von meinen wegen auf den vorgenanten weingartten vnd waz darzu geh/ort oder wem si in hinfur lazzen dhainerlai ansprach noch vodrung nicht mer haben noch gewinnen sol noch enmag in dhainer weis. Ich sol noch enmag auch meine/w obgenantew recht weder verchvmern, verchawffen noch versetzen, noch leibting oder anders iemant von meinen wegen an der vorgenanten dez spitals pfleger vnd auch an eins maisters willen, wizzen vnd gunst, die dann ie zu derselben zeit pflegar vnd maister sind, vnd ob ich oder anders yemant von meinen wegen dar/vber anders icht handelte oder t/aten, haimleich oder offenleich, mit recht oder an recht, gaisleichem oder wertleichem, daz sol nicht chraft nochfurgank haben wider den gagenburtigen prief. Vnd wann im daz ist, daz ich obgenanter Chunrad der Pappenhaimar nicht mer enpin vnd von todes wegen ab gegangen pin, da Got lang vor sei, so ist in vnd irem spital der vorgenant weingartt mit allem paw vnd zugelyrung mit allen eren rechten vnd nutzen zu durchslachtz, ledig vnd los worden, daz ich noch all mein erben vnd nachkomen noch anders iemant von vnsern wegen dhainerlai gewer, ansprach noch vodrung nicht mer haben noch gewinnen soln noch enmugen in dhainerlai beis an gev/ar. Vnd ob ich oder anders iemant von meinen wegen darvber mit in oder mit dem spital chriegten oder rechten, mit recht oder an recht, geistleichem oder wertleichem, daz haben si an aller stat vnd zu aller st/und gewvnnen vnd wehabt, vnd wir verloren an allew widerred. Dez sind teidingar gewesen: die erbergen, Hainreich der Snoper,burgar zu Regens(purch) vndzu den zeiten weinmaister des vorgenanten spitals vnd Chunrad der Bawschar, an der zeit spitalschreib/ar doselbs, vnd Andre auz dem Schadenhof vnd ander erberger lewt gen/unchk. Vnd dez zu einem waren vrchvnd vnd zu einer merern sicherhai, so gib ich in den prief versigelt mit Lienhart dez Simons, an der zeit richt/ar dez hofs der vorstat zu Regens(purch), insigel, daz er durch meiner fleissigen pet willen an den prief gehangent hat, im vnd seinen erben vnengolden vnd an schaden, vnd auch vnengolden der herren stewr vnd fogtei, darum der egenant weingartt gelegen ist. Daz ist geschehen da man zalt von Cristi gepurt drewtzehenhundert jar vnd in dem newnvndnewntzigistem iar an sand Dorothen tag der lieben jvnchfrawn.