Ich Vlrich von dem Stain, vergih an disem gagenwurttigen brif vnd t*vn :I avch chvnt allen den, di in sehent oder h/orent lesen, daz ich daz g*vt, dacz T/vtenakcher, daz Vlrich der Sandersdorfa'r von mir ze lehen hat gehabt vnd daz ich von minem liben herren, dem dvrchla'vchtigen hertzogen Rvdolfen von Bairen ze lehen han gehabt, avf han enpfhangen von dem genanten Sandersdor(f)a'r, vnd han ovch div lehenschaft, div ich han gehabt an dem genanten g*vt, minem vorgeschriben herren, dem hertzogen avfgegeben, freilich dvrch mines hailes willen; vnd also hat min herre der hertzog, dazselb g*vt von miner gvnst vnd von minem g*vten willen, vnd Vlriches des Sandersdorfa'res, geaigent dem spital ze Regenspvrch, vnd sol ich noch min erben, noch Vlrich von Sandersdorf, noch sin erben, nimmer mer dehain ansprach avf di vorgenanten lehenschaft gehaben. Des sint gezevg: her Ott der Chrandorfa'r, Fridrich vnd Hainrich di *Vlraina'r, Vlrich der Gra'sel vnd Wernt von Abensperch. Daz ditz also sta't belib vnd vnzebrochen, han ich disen brif gegeben versigelten mit minem insigel ze einem vrch/vnd, f/vr mich vnd f/vr den Sandersdorfa'r, wan er dehain insigel hat gehabt. Daz ist geschehen do von Christes geb*vrtt waren drevczehenhvndert jar an sant Sthephfans tag.