Ich H/artel ze Zeidlorn, dez Tvndorffer mair, mein hawsfraw vnd all vnser erben, veriehen vnd tun chunt allen den, di den brif :I ansehent oder h/ornt lesen, daz vns vnser genediger herr, her Fridreich der Slaikch, zu den czeiten maister dez spitals sand Katrein, an dem fuzz der prukk zu Regens(purch), vnd di samnung doselben lazzen habent iren vnd irs spitals aygen, ledigen hof, der gelegen ist ze Zeidlorn vnd swaz darzu geh/ort, ze veld vnd ze dorff, besucht vnd vnbesucht, von liechtmess di nochst hin ist /vber sechs ganczew jar di nochst nacheinander choment. Wir s/ullen auch heur in dem ersten jar haws vnd stadel auf den vorgenant hof pawen nach des hofs notd/urfft, on allen iren schaden, auch s/ullen wir in von dem svmerpaw heur dienen vnd geben nach rat Otten dez Elmawer, hofmaister in dem spital, Wernher dez Plankchen vnd Chunrat dez Honchawsel, darnach auf daz nochst jar s/ullen wir in von dem vorgenanten hof nichtz dienen, dann iren chlainen dienst. Vnd dann darnach di vier jar s/ullen vnd wellen wir in iren vorgenanten hof verdienen j/arleich nach beschawung vnd mit allen iren chlaynen diensten vnd rechten, allez nach alter gewonhait vnd nach irs salpuchs sag, auch s/ullen wir j/arleich in ir stift chomen vnd irer stift recht tun als ander ir mair, allez on allen chrieg vnd widerred. Vnd swann di vorgenanten sechs jar auz choment vnd vergangen sind, so s/ullen wir in iren vorgenanten hof mit sambt den zymmern vnd swaz darzu geh/ort, zu veld vnd ze dorff, besucht vnd vnbesucht, pawleich vnd wesenleich ligen lazzen, on all widerred, daz si den f/urbaz lazzen m/ugen swem si wellent, daz wir noch all vnser nachkomen hincz in noch hincz irem vorgenant hof, weder auf paw noch auf zymmer, noch auf allez daz, daz darzu geh/ort, ze veld vnd ze dorff, dhain ansprach noch vodrung nicht mer haben noch gewynnen s/ullen, noch enm/ugen, weder mit gaistleichm noch werltleichm rechten, noch on recht, noch anders yemant von vnsern wegen. Vnd ob wir in vnd irem spital iren dienst, grozzen vnd chlainen, j/arleichen nicht antwurtten vnd geben zu rechter zeit, vnd in nicht allez daz st/at hielten vnd volf/urten, swaz an dem brif verschrieben ist, swelhen schaden si dez allez nemment, dez s/ullen vnd m/ugen si von vns vnd von aller vnsrer hab, besucht vnd vnbesucht, mit irer gult bechommen, mit gaistleichem oder werltleichem rechten, swann vnd swie si wellent; vnd ob wir dar/vber mit in chriegten oder rechten, mit gaistleichem oder werltleichem rechten, oder on recht, daz s/ullen si behabt haben vnd wir verlorn haben. Daz in daz allez also st/at vnd vnzebrochen beleib, dar/vber zu vrch/und geben wir in den brif versigelt mit hern Wernt dez Salrer, zu den zeiten richter ze Zeidlorn insigel, daz er an den brif gelegt hat nach vndrer vleizzen pet, der sach zu einer gezeukchn/uzz, im vnenkolten, darvnder wir vns verpinden mit vnsern trewn st/at ze halten, swaz an dem brif verschriben ist. Dez sind teidinger gewesen: Peter der schreiber in dem spital, Ott der Elmawer, hofmaister in dem spital, Wernher der Plankch, Chunrat der Honchawsel, ped ze Zeidlorn, Heinr(ich) der M/ullner von Regeldorf vnd Wernher der Wagner, purger in der vorstat. Daz ist geschehen nach Cristez gepurtt dreuczehenhundert jar vnd in dem drewvndsibenczgisten jar dez eritagz in der osterwochen.