Ich Vlreich der Zotelmair von Gaillenchofen, mein hawsfraw vnd all vnser erben veriehen vnd tun chunt allen den, di den brif ansehent oder h/ornt lesen, daz :I vns vnser genadiger herre, her Fridreich der Slaikch, zu den zeiten maister dez spitals sand katrein an dem fuzz der prukk ze Regens(purch) vnd gemainleich di samn/ung doselben, lazzen habent iren vnd irs spitals aigen hof, der genant ist der Harthof, vnd ligt vnder dem Ch/anstain mit allew de/u daz darzu geh/ort, besucht vnd vnbesucht, auzgenomen dem A*wnperkch, von liechtmess di hin ist /vber drew gantzew jar di nochst nacheinander choment, mit der beschaiden daz wir denselben hof pawen vnd arbaiten s/ullen on allen gebresten, vnd s/ullen in den j/arleichen verdienen nach beschawung, als schawens recht ist, vnd di svmer sat ist heur vorauz ir, wan si den hof ges/at habent. Wir s/ullen in auch j/arleich geben sechs schilling Regens(purger) pfening wisgeltz, vnd nach dem ersten jar heur iren chlaynen dienst, allew jar zehen h/uner, zwainczikch ch/as vnd hundert ayr. Si s/ullen vns auch prennholcz vnser notd/urfft zu dem vorgenanten hof zaigen, m/ugen wir zawnholtz dopei gehaben, dez s/ullen si vns auch g/unnen, m/ugen wir aber nicht zawnholtz daselbs gehaben, so sind si vns nichtz darvmb schuldig. Wir s/ullen in auch allen iren dienst, grozzen vnd klaynen, ze rechter zeit in ir spital antwurtten vnd f/urn, on allen iren schaden vnd gebresten vnd on allen abgang. Vnd ob wir in den vorgenanten drein jarn nicht gut pawl/aut w/arn vnd in iren dienst j/arleich nicht geben zu rechter zeit trewleichen vnd gentzleich on geuar, oder sust dhainerlay wider si handelten oder t/aten, so habent si vollen gewalt vns ze uerchern in den egenanten drein jarn swann si wellent, on allen chrieg vnd widerred. Vnd swann di egenanten drew jar auz choment vnd vergangen sind, so s/ullen wir in vnd irem spital iren vorgenanten aigen hof vnd waz darzu geh/ort, ze veld vnd ze dorff, besucht vnd vnbesucht, pa/wleichen vnd wesenleichen ligen lazzen, daz si den lazzen m/ugen swem si wellent, als verre daz wir noch vnser nachkomen auf iren vorgenanten hof noch auf pawrecht, noch auf zymmer, noch auf allez daz, daz zu dem vorgenanten hof gehort dhain ansprach noch vodrung nicht mer haben noch gewynnen s/ullen, noch enm/ugen, weder mit gaistleichem noch werltleichem rechten noch on recht, chlayn noch groz, noch anders yemant von vnsern wegen. Vnd vmb daz allez zu einer pezzern sicherhait haben wir in zusambt vns vnuerschaidenlich ze selbscholn vnd ze porgen geseczz Chunrat den v/orstel den Mittermayr dez gvmpprechtz, mair ze Atelpr/unn; Chunrat den Ch*vn, mair ze Gaylenchofen; Fridreichen seinen pruder ze Pa/wrn vnd Albrechten seinen pruder ze R/anhawsen, mit der beschaiden ob wir in allem iren dienst nicht g/aben zu rechter zeit, vnd nicht gut pawl/aut w/arn vnd daz wir in iren vorgenanten hof, ze veld vnd ze dorff, nicht pa/wleich vnd wesenleich ligen liezzen vnd in nicht allez daz st/at hielten vnd volf/urten daz an dem brif verschriben ist, swaz wir in dez /vberf/urn swelhen schaden si daz nement, dez s/ullen vnd m/ugen si mitsambt irem dienst von vns vnd von den vorgenant selbscholln vnd porgen vnd von aller der hab di wir vnd di vorgenant selbscholln vnd porgen haben swo si di begreiffent, besucht vnd vnbesucht, bechommen mit gaistleichem oder werltleichem rechten oder on recht, swann vnd swie si wellent. Vnd vmb swair wir oder di vorgenanten selbscholln vnd porgen dar/vber von der sach wegen mit in chriegten oder rechten, mit gaistleichem oder werltleichem rechten oder on recht, daz s/ullen si allez behabt haben vnd wir vnd di vorgenanten selbscholln vnd porgen verlorn haben, on all widerred. Daz in daz allez also st/at vnd vnzebrochen beleib, dar/vber zu einem vrch/und geben wir in den brief versigelten mit dez vesten ritter hern Vlreich dez P/udemstorffer, zu den zeiten pfleger ze dem Schonnperg insigel, daz er an den brief gelegt hat nach vnser vnd der vorgenant selbscholln vnd porgen vleizzen pet, der sach zu einer gezeukchn/uczz im vnenkolten, darvnder verpinden wir vns vnd di vorgenant selbscholln vnd porgen all vnuerschaidenlich mit vnsern trewn st/at ze behalten swaz an dem brif verschriben ist, wann wir nicht aigner insigel haben. Daz ist geschehen nach Christez gepurtt dreutzehenhundert jar vnd in dem drewvndsibentzgistem jar an der heiligen zwelfpoten abent sand Pfilipp vnd sand Jacob.