Ich Friderich der Wesenakkrer vergih offenlich an disem prief vnd tun chunt allen den, die :I in lesent sehent oder horent lesen, daz ein chriechk vnd ein misshellungen gewesen ist zwischen mir an einem tail und pruder Chunrat dem meister mit sament der samenung des spitales sant Katherinen an dem f/uze der prukke ze Regenspurchk vmb einen hof vnd vmb ein lehen div peidiv gelegen sint in dem dorffe ze Nortershofen, da ich lange ansprach auf gehabt han, vnd geb/uhssen des chrieges peidenthalp mit einander mit gesamenter willechur f/ur di ersamen vnd bescheiden l/aut, hern Heinrich den Gr/aul, schultheizen, vnd di schephen ze dem Nevenmarcht auf ein reht vnd wart alda nach vnser peider tail willen vnd wort der chriechk freuntlich von denselben vorgenanten l/auten durchslihtichlich auf ein ganczes ende verscheiden, also daz mir der vorgenant bruder Chunrat der meister mit sament der samenung des vorgeschriben spitales habent gegewen dritthalp phunt haller vnd han ich mich verczigen vnd verczeih mich hie an disem prief des vorgenanten hofes vnd auch lehens mit allem dem, daz zu denselben guten gehoret, besuchet vnd vnbesuchet, ze holcz vnd auch ze velde, daz ich noch deheiner miner erben furpaz dehein ansprach haben noch schulen haben auf den vorgenanten hof vnd lehen ewichlich. Vnd des sind geczeug dise ersamen l/aut bruder Gunther der meister [des] spitales ze dem Newenmarcht, her Perhtolt der T/aubel, Chunrat der Tegel, Gotfrit der Feuhter, Chunrat der Feuhter, Heinrich der G/vnyr, Heinrich der Wagner, Chunr(at) der Pilgreim vnd ander ersamer l/aut genugk, purger ze dem Nevenmarcht. Vnd daz dem offte genanten pruder Chunrat dem meister vnd auch aller der samenung des vorgeschriben spitales dicz geding staet vnd gancz beleib vnd vnzerbrochen, gib ich in disen prief verinsigelt mit der stat insigel ze dem Nevenmarcht vnd mit hern Heinriches insigel des Graules, schultheizen ze dem Newenmarcht, mit hern Chunrades insigel des Rotenvelseres vnd wan ich eigens insigels niht enhan, verpind ich mich vnder denselben insigeln mit meinen trewen ze laisten vnd ze behalden ane geverde allez daz an disem prief geschriben stet. Vnd daz ist geschehen anno domini millesimo CCCo XIIo in die sancti Vrbani.