Ich Ott von D/urn vnd ver Peters mein hauzvrowe, vnd alle vnser erben, vnd alle vnser nachchomen :I veriehen offenleich an disem prief vnd tvn chunt allen den, di in ansehent oder horent lesen, daz wir mit verdahttem m/uet haben gegeben ain schaf rokken auz vnserm aygen dacz D/urn, daz da haist daz Chirchlehen, dem erberigen spital ze Regenspurch, vnd dasselb schaf schol ebichleich alle iar geuallen hincz dem spital div weil vnd wirs haben, vnd haben auch dez niht gebalt, ich der vorgenant Ott von D/urn noch mein hauzvrowe ver Peters, noch alle vnser erben, noch alle di, die daz vorgenant Chirchlehen immer gewinent, daz si daz vorgenant schaf, daz hincz dem spital gehort, verchauffen schuln noch tmugen, wan iz ebichleich hincz dem spital dienen schol; vnd schol auch dem spital dev erst werung werden auz dem vorgeschriben Chirchlehen, an allen chriech, ob daz aber geschech, daz man dem oftgenanten spital daz schaf niht engeb alle iar, als vor verschriben stat, so schol sich daz vorgenant Chirchlehen veruallen haben hincz dem spital mit aller der gult vnd dazv gehort, an allen chriech. Vnd daz ist geschehen mit sotaner beschaidenhait, daz wir der erberigen vrowen, vern Diemuden, hern Otten tohter von D/urn, alle wochen schuln geben vnsers protes ain laip div weil vnd si lebt, vnd niht lenger, vnd schuln ir den laip geben nach vnserr alten gebenhait vnd sam wir in andern leuten geben. Vnd der red sint ziug: her Gotfrid der Schencze, her Chunr(at) von D/urn, her Rvger sein sun, her Leutolf von Siggershouen, her Ernst von Hausen, her Albreht von Hausen vnd her Wernher von D/urn, vnd anderr frumer leut genunch. Vnd daz daz also stet beleib vnd vnzeprochen, gib ich in disen prief versigelten mit dez erberigen herren insigel, hern Hadmars dez freien von Laber. Der ist geschriben do von Christes gepurt vergangen warn driuzehenhundert iar in dem zwelften iar an sand Erasems tag dez heiligen marterers.