Wir Ludowig von gotes gnaden r/omischer ch/vnig ein steter merer dez riches enbieten :I vnsern lieben vetterlin Heinrich, Otten vnd Hainrich, den herzogen zv Beyern vnd phaltzgrauen bi dem Rine, dem alten Buchberger, pfleger an vnser stat vnserre vorgenanten vetterlin vnd dez landes zv Beyern, darzv allen vnsern vnd derselben vnserre vetterlin edelluten, dienstmanne, vitzt/vmen, richtern, schergen vnd amptluten, swie die genant sin, vnser huld vnd allez gut. Wan wir dez spitals zv Regenspurg l/ute vnd gut vberal in vnser gebiet in vnsern besvndern sch/irm genomen habn, so bitten wir iuch flizzetlich vnd gebieten auch vesticlich bi vnsern hulden, daz ir iuch dezselben spittals l/ute vnd gut enpfolhen lat sin vnd in wider daz reht dhein lait tut, noch ieman des gestatent, daz si ane reht mit ihtv beswered werden. Wizzet daz ir vns daran besvndern dienst tut. Der brief ist geben zv Amberg an dem pfintztag vor sant Thomas dez aposteln tag in dem andern jar vnsers riches.