Ich Fridreich von Pernstainn vergich offenleich an disem gagenb/urtigen prief vnd t/uen iz chunt :I allen den, di in ansehent oder horent lesen, daz ich mit verdahtem m/uet durch meiner sel vnd meiner hausfrowen vnd hern Vlr(eich) meins pruder sel hail in daz spital meiner frowen sant Katterein an dem f/uez der prukk ze Regenspurch f/vnf pfert gegeben han mit der beschaidenhait, ob mich von vngeluch oder von anderm gescheft ain notichait in iaresfrist begreift, da mich Got vor behuet, so behalt ich mir vollen gebalt, daz ich diu vorgenanten pfert wider nemen schol nach hern Vlr(eich) des pfarrer von /Vlsenbach vnd pruder Chunr(ad) von N/vernberch rat, waz mich di hincz dem vorgenanten spital haissen t/ven von den vorgenanten pferten. Ist auer daz, daz mich chain notichait niht begreift in dem iar, daz Got geb, so sint div oftgenanten pfert dez oftgenanten spitals, daz ich noch anders niemant darauf niht mer ze sprechen hat den daz spital; vnd mer verschaid ich in dem iar, dez Got niht engeb, on gescheft oder mit gescheft, so sint div dich genanten pfert auer ledichleich dez spitals an allen chriech, doch mit der beschaidenhait, daz man mein iarzeit begen schol mit der vigilii vnd mit der selmess nach der vorgenanten hern Vlr(eich) dez pfarrer vnd pruder Chunr(ad) rat. Daz also stet weleib vnd vnzeprochen, gib ich in disen prief versygelten mit meinem insygel, der ist gegeben da von Christes gep/urt vergangen warn drivzehenhundert iar in dem f/vnfzehenten iar dez freitages vor sant Pa'rrtelmes tag dez heyligen zwelfpoten.