Ich Perchtolt der Gra/wl, ze den zeyten richter ze Geysselhiring, vergech vnd t/un chunt offenleich mit dem prief allen den, dy in an:Isehent oder h/ornt lesen, daz f/ur mich chom meiner hern chlagpot vnd der d/urftygen von Regenssp/urch awz dem spytal, do ich saz an dem rechten vnd pat mich mit vorsprechen ain vrtayl lazzen werden, wann sy der iung Polst/ar von Erling prannt an schuld vnd an recht, do fragt ich waz reht w/ar, do ertaylt der Reynl ir vorsprech auf sein ayt, man solt den amptman vrlawben, daz er dem Polst/ar wer*ufft drey stund, daz tet der amptman alz es daz reht an in sayt, fryd vnd glayt z/u dem rehten, geben ym vnd seinen helfern drey virczehen tag, da wolt man im gern mynn vnd reht halten, alz dez lancz recht w/ar, do fragt ich waz recht w/ar, do taylt der Raynl auf sein ayt, ch/am er niht nach dez amptman r/uff in den dreyn virczehen tagen, ob yemant chain schaden n/am von meiner hern vnd der d/urftyg wegen von dez Polst/arz hannt, dez solten dy d/urftygen vngolten sein (vnd ?) daz goczhaws vnd ir payder pfleger; dorer Polst/ar chom niht, do fragt ich waz reht w/ar, do taylt der Reinl auf sein ayt, (vnd ?) sy allez daz t/un heten daz recht sayt, wann dy drey virczehen tag awz w/arn man solt in zewch geben, ritter vnd chnecht, dy an der schrann s/azzen vnd ain g/uten prief von gerichcz wegen, vnd gib auch in den prief alz er in ertailt ist, mit meinem anhangendem insygel. Pey dem rechten ist gebesen: horr Pernhart der Ofenstet/ar vnd vir Haynspechen, vnd der Hanns von P/ubing, vnd Chun(rat) der alt H/unermayr, vnd Mertl der Gebhart, vnd dy purger gemayncleich ze Geyselhiring, vnd ander erberg la/wt gen/uch. Der prief ist geben do man zallt von Cristi gep/urt drewczehenhundert iar vnd darnach in dem dre/wvndsybenzigsten iar dez n/achsten sampcztagz vor sand Iacobz tag.