Ich Fridreich der Ger/awtmair ze Gr/auenr/ewt bey Viechhawsen, mein hawsfraw vnd all vnser erben, veriehen vnd tun chunt allen den, :I di den brif ansehent oder h/orent lesen, daz wir vns mit gutem willen verricht vnd vertaydingt haben mit herren Fridreichen dem Slaikchen zu den zeiten maister des spitals sand Katrein an dem fuzz der prukk zu Regens(purch) vnd mit der samnung doselben, vmb all vergangen vnd versezzen schuld vnd zins, di wir in schulldig sein von irem vnd irs spitals aygen gut, daz gelegen ist zu Gr/auenr/ewt, daz wir in schulldig beliben n/ewntzehen schilling der langen vnd zehen pfenning. Nu habent si vns beschaiden vnd genad getan, vnd habent vns dez selben geltz ayn pfunt vnd zehen pfenning lazzen, daz wir in f/urbaz iren zins dester trewleicher vnd f/uderleichen geben s/ullen vnd wellen, vnd allso beleiben wir in noch schulldig aynlef schilling der langen allez Regens(purger) pfenning, der wir si richten vnd wern s/ullen vnd wellen, on allew verpot vnd f/urzokch, f/umf schilling auf di lichtmess di schirst chumbt vnd ayn halb pfunt auf di sunbenten di darnach schirst choment vnd sechtzikch pfenning auf sand Michels tag der darnach schirst chumbt mit sampt irem zins der dann auf denselben sand Michels tag news ein got, vnd geuallen sol dez j/arleichen drey schilling der langen Regens(purger) pfenning sind, di wir in von irem vorgenanten gut j/arleich auf sand Michels tag raychen vnd geben s/ullen, vnuerzogenlih(?) on allen iren schaden allez Regens(purger) pfenning, di dann gib vnd geb sind, w/ar aber, daz wir si irs vorgeschribens geltz nicht richten vnd werten auf yedi vorgenanten vrist vnd auch iren zins j/arleich auf sand Michels tag als voruerschriben ist, swelhi vrist oder swelhez jars wir daz vers/azzen, so sei wir vnd all vnser erben vnd nachkomen geschaiden vnd geuallen von allen den genaden vnd rechten, di wir von iren genaden an dem vorgenanten aygen zu Gr/auenr/ewt haben. Daz si daz f/urbaz lazzen m/ugen swem si wellent, on all vnser irrung vnd widerred, vnd ob wir dar/vber mit in oder mit iren nachkomen chriegten oder rechten, mit gaistleichem oder werltleichem rechten, oder on recht, daz s/ullen si allez behabt vnd wir verlorn haben. Vnd darvber zu einem vrchund geben wir in vnd irem spital den brif versigelten mit hern Vlreich dez hofmaister von Winzzer insigel, daz er an den brif gelegt hat nach vnser vleizz(igen) pet der sach zu einer gezeukchn/uzz, im vnenkolten, darvnder wir vns verpinden mit vnsern trewn st/at ze halten, swaz an dem brif verschriben ist. Daz ist geschehen nach Christz gepurtt drewtzehenhundert jar vnd in dem drewvndsibentzgisten jar dez eritagz vor sand Symon vnd sand Jude tag der heiligen zwelfpoten.