Ich G/org, ich Dietreich, ich Vlreich vnd ich Wilhalm di Hof/ar vom Lobenstain, vnser hawsfraun vnd all vnser erben vnd nachkomen veriehen vnd t*n :I chunt allen den, di den brief ansehent oder h/ornt lesen, daz wir mit veraintem gutem willen vnd mit vnsrer freunt rat, vnser drey weing/arten, der ayner gelegen ist auf der Chager vnd ist genant der Hofer, vnd der ander ligt ze Gr/untal, ze nochst an dez hofmaister in dem Weinhof, weingarten, vnd der dritt ligt ze Tegernhaym vnd ist genant der Strigel vnd st/ozzt an dez Runtinger weingartten, di all drey freys aigen sind mit allew dew daz darzu geh/ort vnd mit allen ern, rechten vnd n/uczzen als si vnser lieber vater selig vnd wir selben inn gehabt haben, besucht vnd vnbesucht, recht vnd redleich ze durchslecht verchawfft vnd geben haben als chawffs recht ist, dem beschaiden mann hern Hainreich dem Zell/ar, seiner hawsfraun vnd allen iren erben vnd nachkommen vmb ein sogetan gelt dez si vns mit beraiten pfening verricht vnd gewert habent, gar vnd genczleich, daz wir dez nicht schaden genomen haben. Wir haben auch si der vorgeschriben dreir weing/artten gewaltig getan vnd geseczzt in n/uczz vnd in gewir mit dem gagenb/urtigen brief, vnd verzeihen vns der ze durchslecht als verre daz wir noch all vnser nachkomen darauf noch darnach nicht mer ze uodern noch ze sprechen haben, noch gewynen s/ullen noch enm/ugen, weder mit gaistleichem noch werltleichem rechten, noch on recht, chlain noch groz, f/urbaz nymmer mer noch anders yemant von vnsern wegen in dhain weis; darzu haben wir in gehaizzen vnd gelobt mit vnsern trewn, daz wir in di vorgenanten drey weing/artten mit aller zugeh/orung versten vnd versprechen s/ullen vnd wellen mit dem rechten f/ur allen irresal, swo vnd von swem, vnd als offt in dez not geschiecht von vnsern wegen als aigens, dez landez vnd der herschefft recht ist, do di weing/artten inn gelegen sind, on allen iren schaden. Vnd darvmb zu einer pezzern sicherhait haben wir in zusambt vns vnuerschaidenlih ze porgen geseczzt di vesten ritter vnser lieb freunt, hern Degenhart den Hofer von Truchtelbing, hern Dietreich den Awer von Stefnyng, hern Dietreich den Saczzenhofer von Valkchenstain vnd hern Eberhart den Hofer von Swantt, also mit der beschaiden, ob wir in di vorgenanten drei weing/artten mit aller zugeh/orung nicht verst/unden vnd verspr/achen mit dem rechten, vnd in nicht allez daz st/at hielten vnd volf/urten, swaz an dem brief verschriben ist oder swelherlai pruch oder irresal in daran gesch/ach von vnsern wegen, so habent si allzeit vollen gewalt, vns vnd di vorgenanten porgen darvmb ze monen, swann si wellent, so s/ullen wir vnd di vorgenanten porgen in dann ze hant vnd vnuerzogenleich nach irer monung, daz ainer auf den andern noch auf yemant anders nicht sol waigern laisten, yeder man mit einem erwerigen diener vnd mit einem pf/ard gen Regens(purch) in ir haws oder in ein ander erwerigz gasthaws, do si vns einzaigent in geisels weis. Wir s/ullen auch der laistung all vnuerschaidenlih nachvolgen als recht ist vnd darauz nymmer chommen, als lang vncz wir in allez daz auzgerichten vnd volf/urn dez si gebresten habent, swaz an dem brif verschriben ist, vnd darzu allen den schaden, den si sein genommen habent oder nement, den si gesprechen m/ugen bei iren trewn on all beredn/uzz; dezselben schadens allez mit sambt dem hawptgut, s/ullen vnd m/ugen si von vns vnd von den vorgenanten porgen, vnd von aller der hab di wir vnd vnser porgen haben, swie di genant ist, besucht vnd vnbesucht, bechommen mit gaistleichem oder werltleichem rechten, swann vnd swie si wellent. Vnd ob der porgen, ainer oder mer, in der zeit nicht enw/ar e daz wir in de*w vorgenant weingarten verst/unden als vor uerschriben ist, so s/ullen wir in ye einen andern als guten porgen vnd den si als gern nement, an dez stat seczzen dez ye dann gebresten ist, nach irer monung inner vierzehen tagen oder wir vnd di lebentigen porgen s/ullen in darvmb laisten in all der mazz als oben uerschriben ist, als lang vncz ez geschiecht vnd vmb swew wir oder vnser porgen dar/vber von der sach wegen mit in chriegten oder rechten, daz s/ullen si allez behabt haben, vnd wir vnd vnser porgen verlorn haben. Daz den vorgenanten purgern ze Regens(purch) oder swer den brif von iren wegen inn hat vnd f/urbringt, daz allez also st/at vnd vnzebrochen beleib, dar/vber zu einem vrch/und geben wir obgenant, ich Gorg, ich Dietreich vnd ich Vlreich di Hofer in den brif versigelten mit vnsern insigeln f/ur vns, f/ur vnser hawsfraun vnd f/ur all vnser erben vnd nachkomen, vnd mit der vorgenant porgen insigeln. So vergich ich obgenanter Wilhalm der Hofer, daz ich zu den zeiten nicht aigens insigels het vnd verpind mich mit meinen trewn vnder di vorgeschriben insigel allew, st/at ze halten swaz an dem brif verschriben ist, diweil a*uch der brif versigelt ist mit einem insigel oder mer, so sol er gut vnd vnuersprochen sein an aller stat. Daz ist geschehen nach Christez gepurtt dreuczehenhundert jar vnd in dem zwayvndsibenczgisten jar an aller heiligen abent.