Ich Vlreich, des smitz sun von Reisch, vnd ich Vlreich der smit, sein vater, vnser hawsfrawn vnd alle vnser eriben :I vnd nachkomen veriechen vnd tun chunt allen den, die den brief ansehent oder h/orent lesen, das wir vns liepleichen vnd frevntleichen verricht vnd vertaydingt haben nach vnserer frevnt rat ze durchsl/acht auf ein gancz end mit vnsern gen/adigen herren, dem maister dez spitals sand Katreyn an dem f/uzz der prukk ze Regens(purch) vnd mit dem conuent doselben, vmb alle die chrieg st/ozz, ansprach vnd vodrung, die wir hincz in vnd hincz irem spital vnd hincz irem hof ze Aschach gehabt haben, swie sich daz vergangen hat vncz auf den hewtigen tag als verre, daz wir f/urbas von derselben ansprach vnd vodrung wegen hincz in noch hincz irem spital, noch hincz dem vorgen(antem) hof ze Aschach, noch hincz aller irer hab, die si habent, swo si di habent, noch hincz allen iren l/auten vnd g/uten, swie die genant sind, dhain ansprach noch vodrung nicht mer haben noch gewinnen s/ullen noch enm/ugen, weder mit gaistleichem noch wertleichem rechten noch an recht chlain noch groz f/urbas nymmermer, noch anders nyemant von vnsern wegen in dhainerlay weis. Vnd ob wir daz mit ichtew /vberf/uren in dhainen stukchen, so s/ullen wir /vbersagt la/wt sein an aller stat, swo si vns anchoment vnd begreyffent, daz wir dhaines frides noch gelaites, noch dhainer freyung, di wir hieten oder gewunnen daran nicht geniezzen s/ullen noch enm/ugen in dhain weis. Vnd vmb daz allez ze einer pezzern sicherhait, haben wir in zusamt vns vnuerschaidenleich ze porgen gesetzzet Chunraden den S/achslein von Geysental, H/artel den amman von Swaichawsen, Perchtolten den mair auz der Rewt, Fridreichen den Witzl/ar vnd Fridreichen den halpmair mit der beschaiden, ob wir vnsern vorgenanten herren nicht allez daz st/at hielten, laisten vnd volf/urten, daz an dem brief verschriben ist, in swelher weis wir daz /vberf/uren mit warten oder mit werchen, swelhen schaden si dez nement, den si gesprechen m/ugen bey iren trewn an alle beredn/uzz. Dez s/ullen vnd m/ugen si bechomen von vnsern vorgen(anten) porgen vnd von aller irer hab, die si habent, besucht vnd vnbesucht, mit dem rechten gaistleichem vnd wertleichem oder an recht, swie si wellent, daz si irer herschaft noch dhainer freyung daran nicht geniezzen s/ullen in dhainer weis. Vnd vmb swew wir oder vnser porgen oder anders yemant von vnsern wegen von der sach wegen dar/vber mit in chriegten oder rechten mit gaistleichem oder wertleichen rechten oder an recht, diselben chrieg vnd recht s/ullen si alle behabt haben vnd wir verloren haben, als wir in daz allez gehaizzen vnd gelobt haben mit vnsern trewn an allez gev/ar. Daz in daz also st/at vnd vnzerbrochen beleib, dar/vber ze einem vrch/und vnd ze einer best/atichait geben wir obgen(anten) selbscholn vnd porgen in den brief versigelten mit hern Ortlieb dez Hornperger insigel vnd mit hern Hannsen dez Chemnater, ze den zeiten richter in der vorstat ze Regens(purch) insigel, di paid irew insigel an den brief gelegt habent nach vnser aller vl[e]izzigen pet der sach ze einer gezeuchn/uzz, in selben vnd iren eriben an allen schaden vnd vnenkolten der hantuest, di vnser herren vor von vns inne habent. Darvnder wir vns verpinden mit vnsern trewn, wan wir nicht aygener insigel haben. Vnd dieweil auch der brief versigelt ist mit ainem insigel oder mit in paiden, so sol er gut vnd vnuersprochen sein an aller stat. Daz ist geschehen, do man zalt von Christes gep/urtt drewczehenhundert iar vnd in dem zwayvndsibenczigistem iar dez nochsten freytages nach sand Ambrosius tag dez heiligen lerer.