Ich mair Ch/unr(at) von Aschach, weilent gesezzen hinder her Heinr(ich) dem Symon ze Lerchenuelt, p/urger ze Regens(purch), mein hausfraw :I vnd alle vnser erben veriehen offenlich mit disem brief allen den, die in sehent oder h/orent lesen, daz wir vnsern gnedigen herren, pr/uder Hansen, maister des spytalz sand Kathrein an dem f/uzz der pr/ukk ze Regensp/urch, ze porg gesetzt heten hintz her Heinr(ich) dem vorgenanten Symon, hintz seiner ha/usfrawn vnd hintz allen seinen erben, vmb etwy vil geltz vnd auch getraitz vnd vmb swaz si hintz vns ze sprechen heten von ires hofs wegen ze Lerchenuelt den wir von in gehabt heten, also daz wir vnserm egenantem herren, pr/uder Hansen dem spitalmaister pei vnsern trewen gehiezzen, wir wolten in l/osen vnd ledigen vmb daz egenant gelt vnd auch getraid, vnd vmb allen den schaden den er n/am an allen abganch. Daz verzoch sich so lang, daz wir vnsern egenanten herren, pruder Hansen den spytalmaister, den wir ze porgen gesetzet heten, nicht losten vnd ledigten vntz im z/ugesprochen wart vmb schaden, do wetwang mich vorgenanten Ch/unr/at) vnser egenanter herr, pr/uder Hans der spytalmaister, mit seiner vanchn/uzz alz lang vntz wir in ledigten vnd losten von dem vorgenantem her Heinr(ich) dem Symon, von seiner ha/usfrawn vnd allen seinen erben hauptg/utz vnd schadens an allen abganch. Do daz geschach, daz vnser gnediger herr, pr/uder Hans der spitalmaister, ledichk vnd loz gesagt wart von dem egenantem her Heinr(ich) dem Symon, von seiner hausfraw vnd von allen seinen erben, vmb daz egenant hauptg/ut vnd vmb den schaden den er sein genomen het, dornach wesorgt sich vnser gnediger herr, p(ru)der Hans der spytalmaister vnd sein gotzha/us, wir w/urden im, ich egenanter mair Ch/unr(at), mein Hausfraw vnd vnser erben z/usprechen vnd anuertigen vmb die vorgenanten vanchn/uzze, daz er vnd sein gotzha/us des von vns sicher vnd /vberhaben sei. Dorvmbe geben wir im vnd seinem gotzhaus disen brief z/u einer sicherheit, also daz wir, ich oftgenanter mair Ch/unr(at) von Aschach, mein hausfraw vnd alle vnser erben noch nymant von vnsern wegen f/urbaz ewichkleich nichtes nicht ze sprechen noch ze vodern haben hintz vnserm oftgenanten herren, pruder Hansen, noch hintz seinem gotzha/us vmbe die vorgenanten vanchn/uzz, die do geschach von des oftgenanten geltz wegen, wenichk oder vil, chlein noch groz; der versigelt ist mit des erberigen mannes her Reychirs an des Hertzogenhof, p/urger ze Regens(purch) vnd mit des erberigen mannes her Symons, richter ze Mosheim insigeln, die si d/urch vnser vleizziger pet willen doran gelegt habent in an schaden, dorvnder wir vns verpinden pei vnsern trewen an geu/ar, wanne wir aygener insigeln nicht enhaben, allez daz st/at ze behalten daz oben geschriben ist. Daz ist geschehen nach Christes gep/urtt dre/utzehenh/undert jar vnd dornach in dem sechtenvndfunftzigistem jar an sand Dorothea tag der heiligen j/unchfrawn.