Ich Nycla der Weichser von Trawbling, zu den zeiten lantrichter ze Haida/w, vergich vnd tun chunt offenbar mit :I dem brief, do ich saz an offem rechten ze Mundreiching mit vollem gewalt, do chom f/ur mich Peter der schreiber vom spital sand Katrein, an dem f/uzz der prukk ze Regenspurch, mit vollem gewalt von dez egenanten spitals wegen mit vorsprechen vnd sprach, Gerl der Polster vnd sein helffer der prant daz spital vnd sein arm laut, do t/at er in vnrecht an vnd wolten im dez gern recht halten, vnd wolten gern zu inn reiten wo er hin begert, vnd wolten mit im t/agen mit der mynn oder mit dem rechten, vnd wolten im darauf frid vnd gelaitt gewynnen zu der mynn oder zu dem rechten, vnd auch davon als lang er sein begert, vnd pat darvmb ze fragen waz recht w/ar, do fragt ich waz recht w/ar, do ertailten di vorsprechen vnd di erwerigen l/aut di an der schrann waren, ez solt der amptman auzr/uffen, an der schrann vnd vor drein pfarrchirchen drey vierzehen tag, vnd wolt man im gern gewynnen frid vnd gelaitt zu der mynn oder zu dem rechten von meins herren dez herczogen amptla/uten, wo sy dez beger/aten ynner landez, daz sagt volg vnd frag vnd daz recht, daz hat der amptman getan als daz recht gesagt hat. Do di drey vierzehen tag vergangen warn, do chom der obgenant Peter der schreiber von dez spitals wegen mit vorsprechen wider zu dem rechten vnd pat im einer vrteil ze fragen, di drei vierzehen tag di w/aren vergangen als daz recht gesagt het vmb Gerlein den Polster vnd sein helffer, di w/arn nicht chomen, weder zu der mynn noch czu dem rechten, do fragt ich nv waz recht w/ar, do ertailten di vorsprechen vnd di erwerigen la/ut, di bei dem rechten waren, ez solt Peter der schreiber wartten di weil ich s/azz an dem rechten ob noch yemant ch/am von dez Polster wegen vnd seiner helffer, do wartt Peter der schreiber von dez spitals wegen vncz ich auf gest/und, als im daz recht gesagt hat, do pat im Peter der schreiber einer vrtail ze fragen, seint er gewartt hiet als lang vntz daz ich aufgestanden w/ar an dem rechten, do fragt ich waz recht w/ar, do ertailten di vorsprechen vnd di erwerigen l/aut, di pei dem rechten warn, ez solt meiner herren zehent ledig sein vnd ander ir g/ult wo sy di in dem lant hieten vnd scholten di erwerigen la/ut di iren zehent inn habent vnd ander ir g/ult nv dem spital dienen vnd geben on all widerred, vnd ob yemant davon schaden n/am wie der schaden genant w/ar von dez Polster wegen vnd seiner helffer, dez sol daz offtgenant spital vnenkolten sein, daz sagt im allez volg vnd frag vnd daz recht. Pei dem rechten sind gewesen: her Hanns der Ergolsperkch von /Atelhawsen, her Hanns der Alchaymer von G/uttyng, Ekkprecht der G/uttinger von /Afhawsen, Chunrat der Pekch, der vorsprech von Erling, Engelher der vorsprech von M/undreiching vnd Lewpolt der Amman von M/undreiching, Chunr(at) der Rosenmair von M/undreiching vnd Hanns der Egr/ar von M/undreiching, vnd Walthir der amptmann von M/undreiching vnd andrer erweriger la/ut ein michel tail. Vnd dar/vber zu einem vrch/und vnd zu einer gezeukchn/uzz, gib ich dem vorgenanten spital den brif von gerichtz wegen versigelt mit meinem insigel als er mit den rechten ertailt ist worden. Daz ist geschehen do man zalt von Christez gepurtt dreuczehenhundert jar vnd in dem drewvndsibenczgisten jar dez pfincztagz an sand Symon vnd sand Jude abent.