Ich Hainreich der Snoper, burg/ar zu Regens(purch), mein hawsfra/w vnd all vnser erben vnd nachkomen bechennen vnd :I t/un chunt /offenleith mit dem brief allen den, die in ansehent oder h/orent lesen, daz vns der erberg herr Liebhart der Prettpekch, an der zeit maister des spitals sand Kathrein an dem fuezz der prukch zu Regens(purch), vnd gemainkleich die samung doselben nach rat, g/unst vnd gutem willen irer obristen von dem k/or vnd von dem rat der stat zu Regens(purch), recht vnd redleich verlihen vnd lassen haben iren vnd dez spitals aigen weingarten, genant der Visch/ar vnd der gelegen ist neben dez Grutschen weingartten auf meinen, obgenanten Hainreich dez Snopers, leib vnd auf frawn Annen meiner wirttinn leib, fridleich vnd freileich inn zu haben, zu wesiczen, zu niessen vnd zu n/utzzen alz leibtings recht ist, all die weil vnd wir obgenant zwen leib paid leben oder vnser ainer mit der weschaiden, daz wir den obgenanten weingartten pewleich vnd wesenleich stellen, halten vnd verbesen sch/ullen mit mist, mit stekken, mit erd tragen, mit lesen, mit pietlon vnd mit aller arbeit, svmer vnd winter nichtz auzgen/omen, alz paws vnd guter pawle/wt recht ist, an alles gev/ar vnd an all ir sch/aden. Wir sch/ullen auch in vnd irem vorgenanten spital aller iar i/arleich davon dienen, geben vnd mittailen ie den dritten emer weins, alz vil dann weins an irem vorgenanten weingartten wirt, vnd iarleich vor dem piet an all ir m/ue vnd sch/aden. Sie sullen vnd m/ugen auch i/arleich in iren egenanten weingartten senden vir erberg man, die dy arbeit erchennent, daz si den weingartten schawn vnd sch/atzen s/ullen ob wir dem spital hilfleich vnd nutzleich sein; vnd welichs iars sich daz erf/vnd, daz wir den vorgenanten weingartten nicht pewleich vnd wesenleicht stelten vnd hielten mit allen sachen alz vor verschriben ist, so sei wir zu hant darnach abgeschaiden von vnserm vorgenanten leibting vnd von allen vnsern rechten, also, daz wir noch anders yemant von vnsern wegen auf den vorgenanten weingarten vnd waz darzu geh/ort nichcz ausgenomen, vnd wem si in f/urbaz lassen dhain ansprach noch vodr/ung nicht mer haben noch gewinnen schullen noch enm/ugen in dhainer weis an gevar. Wir sullen noch enm/ugen auch vnsrew egenantew recht vnd leibting auf irem vorgenantem weingartten weder verchvmern, verchawffen noch versetzen an der vorgenanten, dez spitals pfleg/ar vnd auch an eins maisters willen, wissen vnd g/unst, der ie dann zu derselben zeit maister ist; vnd ob wir darvber anders icht handelten oder t/aten, haimleich oder /offenleich, daz sol chain chraft noch furganchk haben, an dhainer stat wider den gagenb/urtigen prief. Vnd ob wir n/u gut pawle/wt sein vnd vnser lebtag mit irem willen vnd g/unst dapei beleiben, vnd wann wir obgenant ped leib ab von todes wegen gegangen sein, da Got lang vor sei, so ist in vnd irem spital der vorgenant weingartt mit allem paw vnd zugeh/orung, vnd mit allen eren, rechten vnd n/utzzen zu durchslachtz ledig vnd los worden, daz wir noch all vnser erben vnd nachkomen dann furbaz darauf noch darnach dhainerlay gewer, ansprach noch vodrung nicht mer haben noch gewinnen sullen noch enm/ugen, weder mit recht, an recht, geistleichem noch wertleichem noch anders iemant von vnsern wegen in dhainer weis; vnd ob wir, vnser erben vnd nachkomen oder anders yemant von vnsern wegen darvber wider den gagenburtigen prief mit in kriegten oder recht[en], mit recht oder an recht, daz haben si an aller stat vnd z/u aller st/und gew/unnen vnd wehabt vnd wir verloren. Daz in daz alles allso stat vnd vnzerprochen beleib, darvber zu einem vrch/und vnd zu einer merern sicherhait, so gib ich obgenanter Hainreich der Snoper vnd fraw Anna mein eleichew den prief versigelten mit dez erbergern meins richtter insigel, hern Hansen dez Gvmprechtz, an der zeit Schultheizz zu Regens(purch), daz er an den brief gelegt hat nach meiner fleissigen [pet], der sach zu einer gezewkchn/uzz, im vnd seinen erben vnengolden vnd an schaden, darvnder wir vns verpinden mit vnsern trewn stet zu halten waz an dem prief verschriben stet. Daz ist geschehen nach Cristi gepurtt drewczehenhvndert jar vnd darnach in dem achtvndnewntzigistem jar an sand Peterstag zu der kethenfeir in der vasten.