Ich bruder Nyclas, ch/umtevr dacz sant Linhart ze Regenspurch, vnd vberal diu gemain der pruder :I desselben conuentes veriehen vnd t/un chunt offenlich an disem brief, daz wir ze chauffen haben gegebn dem spital ze Regenspurch, daz gelegen ist an dem fuezz der prukk, f/umfvndvierzich pfenning geltes die man vns dient allev jar von einer vleischpenche die der Geuse inne hat, vnd deizzich pfenning geltes die vns dazselb spital dient allev jar von eines purga'rs jartach, hies der Zelna'r auf der T/unawe, vmb vierthalb pfunt Regens(purger) pfenning, der si vns gar vnd ga'nczlich gewert habent, ob auch daz vorgenant spital ymen anspra'che oder irren wolt an der egenanten g/ult, so schol ich der vorgenant ch/umtevr oder swer pfleger ze sant Linhart nach mir den dienst vnd diu g/ult dem spital recht vertichk machen mit dem rechten an allen seinen schaden. Darvber ze einer sta'tichait geb wir disen brief mit meinem vnd des conuentes insigeln versigelten. Des sache sint zeuge: her Walther von Halle, her Heinr(eich) von Schutenhouen, her Vlreich, bruder Heinr(eich) der Gruba'r, bruder Albrecht, bruder Lavtwein, her Ruger der richter, her Seyfrit der schreiba'r, Chunr(ad) der Chnautlinger vnd anderr frumen la/utter genunch. Der brief ist gegeben, do von Christes gep/urt ergangen waren drevzehenhundert jar, darnach in dem zwaintzkisten jar der mittichen vor dem antles tage.