Ich Erhart der Leutman, purger ze Regens(purch), vnd ich Walp/urch sein hawsfraw, veriehen vnd tun chunt allen den, di den brif an:Isehent oder h/ornt lesen, daz vns her G/org der Denchlinger, chorherre ze alten chappell ze Regens(purch) vnd zu den zeiten maister dez spitals sand Katrein, an dem f/uzz der prukk ze Regens(purch), vnd gemainleich di samnung doselben, lazzen habent ir vnd irs spitals aigen haws vnd hofstat, gelegen ze Regens(purch) in Z/andynnstrazz, daz ekkhaws ze nochst an dem haws daz weillent dez alten Lauterbekchen waz, zu vnser zwain leiben fridleich vnd freileich ze besiczzen, ze niezzen vnd ze n/utzzen, diweil wir paidew leben oder vnser ains nach leibtingz recht, also mit der beschaiden, daz wir in vnd irem spital j/arleichen davon ze zins geben s/ullen, zwelf schilling der langen Regens(purger) pfenning, all jar zu den drein gew/onleichen zinszeiten, ze weichnaten ain halb pfunt, ze sand G/orgen tag ein halb pfunt vnd ze sand Haymerams tag ein halb pfunt, on allen abganch vnd on allen iren schaden, zu yeder czinszeit Regens(purger) pfenning di dann gib vnd g/ab sind, vnd zu welher zinszeit wir in den zins vers/azzen, darnach di nochsten vierzehen tag, ye alz offt s/ullen wir in denselben zins darnach ze hant geben mit der zwispild nach purkchrecht, on allen chrieg vnd widerred; w/ar aber, daz wir in den zins vnd di zwispild ein jar vers/azzen, so sey wir geschaiden vnd geuallen von allen den rechten di wir an dem vorgenanten haws vnd hofstat haben, daz si ez f/urbaz lazzen m/ugen wem si wellent, on all irreung vnd hindern/uzz. Ez ist auch gered vnd geteidingt worden, welherlay infal oder vodrung auf daz vorgenant haws ch/am, ez w/ar vmb schaczstewr oder vmb wachten, oder von we/w daz w/ar von der stat vnd der purger wegen, daz s/ullen vnd wellen wir allez selb auzrichten vnd verantwurtten on allen iren vnd spitals schaden, darzu ist auch geredt vnd geteidingt, daz wir [daz] vorgenant haws pawleich vnd wesenleich halten sullen vnd pawen vnd pezzern, daz ez icht erger werd allez in vnd irem zins [o]n schaden vnd vnenkolten, gesch/ach auch, dez Got nicht engeb, ob daz vo[rg]enant haws abverprunn von aigem feur oder von anderm feur, so sullen wir darnach in dem nochsten jar ein ander haws auf di hofstat pawen als gut alz ez vor gewesen ist, on allen iren vnd irs spitals schaden, vnd auch vnenkolten iren zinsen vnd rechten; w/ar aber, daz wir darnach in dem ersten jar nicht hinwider pawten alz vor verschriben ist, so sei wir aber geuallen von allen den rechten, di wir daran haben, daz si ez selb hinwider pawen m/ugen oder lazzen vnd geben wem si wellent, on all ansprach vnd widerred, vnd si m/ugen auch irer versezzen zins vnd der zwispild von vns vnd von allez vnsrer hab, besucht vnd vnbesucht, bechomen mit dem rechten, wann vnd wie si wellent. Wan auch wir vnserew recht vnd leibting, di wir an dem vorgenanten haws vnd hofstat haben verchauffen oder versezzen wellen, daz m/ugen wir wol tun, wann vnd wem wir wellen, in vnd irem spital vnenkolten an iren zins vnd recht, vnd daz s/ullen wir auch handeln vnd tun mit eins spitalmaister der ye dann ist, willen, wizzen vnd gunst; wann auch wir obgenant zwen leib paid nicht mer ensein vnd von todez wegen abgen, dez Got lang nicht engeb, so ist in vnd dem spital ir vorgenantz haws vnd hofstat mit allen zugeh/orung ze durchslecht ledig vnd loz worden, on all ansprach vnd widerred, daz vnser erben vnd nachkommen dhainerlay recht noch ansprach darauf nicht haben sullen. Daz in vnd irem spital daz allez also st/at vnd vnzebrochen beleib, dar/uber zu einem vrch/und geben wir in den brif versigelten ich Erhart der Leutman mit meinem insigel vnd mit hern Otten dez Woller, zu den zeiten schulthaizz ze Regens(purch), insigel daz er an den brif gelegt hat nach vnsrer vleizz(ig)en pet der sach zu einer gezeukchn/uzz im vnenkolten, darvnder verpind ich mich obgenantew Walpurch, dez Leutman hawsfraw, mit meinen trewn st/at ze halten waz an dem brif verschriben ist, wan ich nicht aigens insigels han. Daz ist geschehen nach Cristi gepurtt dreuczehenhundert jar vnd in dem fumfvndsibenczgisten jar an sand Gallen tag.