Ich Albrecht der Cholner vnd ich Angnez, sin hausfr/owe, vnd ich Hainrich der /Otlinger, vnd ich Katheri, sin hausfr/owe, :I vnd ich Vlrich, vnd ich Otte, hern Hiltwinez s/vne, ver/yehen vnd t/vn chvnt allen den, di disen brief ansehent oder horent lesen, daz ein chriekh was zwischen vnser ainhalben vnd anderthalben der erba'rigen herren, hern Hainrichez, dez probstez von sant Mangen vnd pr/uder Chvnratez, dez maisters von dem spitale, gelegen an der prukke ze Regens(purch), vnd dez erberigen p/urigers, hern /Ortliebez dez Gvmprechtez ze Regensp/urch, vmb hern Otten dez Chrandorffer gescha'ft, dem Got genade, vnd derselbe chriekh ist mit vnser aller willen vnd gvnste verricht vnd vertaidingt, also, daz si vns habent gegeben vnd gewert sechtzich pfvnt Regensp/urger pfenning, vnd habent vns die enpholichen *vf vnser trewe vnd *vf vnser sele, daz wir siner sele damit t/vn sulen, daz wir wizzen daz ir helflich vnd fuderlich sei in allem dem recht als in ez vnser lieber vr/wnt, her Otte der Chrandorffer, enpholichen het, dem Got genade, do er jvng ist vnd na'hste was, mit der beschaidenhait, daz wir vns verzigen haben alles dez, dez her Ott der Chrandorffer hinter im lazzen hat, daz sei an eribe, an Lehen, an aigen, an hausern oder an varenden g/ut, besucht vnd vnbesucht, daz wir darvmb hincz in noch hincz anders niemen niht mer ze sprechen sulen haben, chlain noch gr/oz, vnd verzeichen vns aller ansprach vnd aller voderunge hincz in, f/ur vns vnd f/ur alle vnser erben, vnd sulen in wol g/vnnen, daz si daz gescha'ft volfuren, als ez in v/ormalez hincz /irn trewen enpholichen ist, vnd sulen seu daran fudern vnd niht hindern noch irren, swaz dez gutez ist, vber di sechczich pfvnt Regensp*urger pfenning. *Vch haben wir gehaizzen vnd gelobt alle vier vnuerschaidenlich bi vnsern trewen, daz wir Hiltwinen, hern Hiltwinez s/vn, dem Got genade, darzv bringen sulen, swann er ze sinen jaren chomen ist, vnd wir dez ermanet werden von in, darnach in einen halben jar, daz er sich dann verzeich aller ansprach vnd aller voderunge, in allem dem recht als wir vns verzigen haben, ta'ten wir dez niht, in der v/orgeschriben zeit, swelichen schaden si dez nement, den schulen wir in abt/vn gar vnd ganczlichen an allen gebresten, vnd habent *vch vollen gewalt her Hainrich, der probst von sant Mang, pruder Chvnrat, der maister von dem spital, her Ortlieb der Gvmpreht, ir ainer oder si alle dri, vnder vns vieren, zwen ze manen, swelich zwen si wellent; vnd sullen die ze Regensp/urch invaren vnd da laisten, in geisels weis, vncz in der schade abgelegt w/irt, den si dez genomen habent oder na'men, wer /vch dez Got niht engebe, ob vnder vns vieren, ir ainer oder mer in der frist niht enwa'ren, e daz sich der v/orbenant Hiltwein verzige, so sulen wir in ie einen als guten an di stat seczen iner vierczehen tagen, oder di lebentigen sulen in laisten vncz in ein als guter an dez stat wirt gesetzet, als der ist gewesen dez gebresten ist. Wir veryehen *vch alle vier, daz wir der vorbenanden sechczich pfvnt Regens(purger) pfenning verricht sin vnd der f/vmfczich pfvnt Regensp*urger pfenning, di vnser lieber vr/wnt her Otte der Chrandorffer v/ormalez het geschaft, hern Hiltwinez chinden, iedem chinde zehen pfvnt Regenspurger pfenning, daz werdent also f*vmfczich pfvnt Regens(purger) pfenning. Daz disev verricht sache vnd verzeichnvsse also sta't vnd vnzerbrochen beleibe, darvber geben wir in disen brief mit vnser aller vierer insigel, versigelt ze einem *vrchvnde vnd ze einer besta'tichait. Dez sint gezeuch: her Hainr(eich) von /Owe, der probst ze Regens(purch), her Hainr(eich) der Zant, schulthaicze ze Regens(purch), her Vlr(eich) der Tvndorffer, her G/vmperht an der Haide, her Leupolt der Gvmperh(t) sin pr/uder vnd ander erberig puriger ein michel taile, vnd ist geschehen ze Regenspurch, do von Christez geb/urt waren drivczehenhvndert jar vnd in dem f/vmfczehenden jar dez na'hsten montagez nach sant Gregorin tag.