Ich Martein Gebenpekch, z/u den zeiten maister dez spitals sand Kathrein an dem f/uzz der pruk z/u Regens(purch) vnd ge:Imainlich der conuent doselben wechennen offenlich mit dem brief allen den, dy in ansehent, h/orent oder lesent, daz wir mit g/uten willen recht vnd redlich verlihen vnd lassen haben vnser vnd dez spitals vier aygen /akcher, gelegen in dem purkfeld z/u W/uczenstain, den erbern lawten, Otten vnd Vlrich den Metgeben, ped gepr/uder Albrechtz dez Vnr/uchel s/aligen enicheln, auf ir payder leib daz si dy /akcher inn haben vnd n/uczen s/ullen dy weil sy paid oder ir ainer lebent nach leiptings recht, also mit der weschaiden, daz si paid oder ir ainer der dann lebpt oder wer dy vorgenanten /akcher von iren wegen ir lebtag inne hat vns vnd vnserm spital alle jar j/arlich davon ze zins dienen vnd geben s/ullen zehen pfenning vnd ain pfunt Regens(purger) pfenning, an abgankch, an sand Marteins abent oder an seinem tag, vnd auch pfenning Regens(purger) m/vnsse dy dann gib vnd g/ab sind ze Regens(purch) in der stat an allez verpot vnd verzog, vnd swelhes iars sy sa/wmig daran w/arn, daz sy oder wer dy egenanten /akcher von iren wegen inne hat, vns vnd vnsern nachkommen aller j/arlich den obgenanten zins nicht richten vnd werten auf dy zeit als oben verschriben ist, oder in den nachsten vierczehen tagen hinnach , so s/ullen sy vns den obgenanten zins ze hant darnach geben mit der zwispild an all chrieg vnd widerred. Sy m/ugen auch dy egenanten /akcher verseczen, verch/umern vnd verch/wffen vmb ir notd/urft vnd iren frum damit schaffen, wie sy wellent mit vnserm vnd vnsrer nachkomen willen vnd wissen, vnenkolten vns an vnserm obgenanten zins vnd ob dy obgenanten zwen leib nicht mer wolten oder verm/achten dy egenanten /akcher verlesen mit pa/w vnd andrer zugeh/orung, so s/ullen sy oder wer dy vorgenanten /akcher inne hat vns vnd vnsern nachkomen dyselben /akcher z/u rechter zeit vnd weil auf sagen vnd wesenlich, vnd pawlich ligen lassen mit alle/w de/w vnd darz/u geh/ort, trewlich an alles geu/ar; t/aten sy des nicht vnd auch daz sy nicht alles daz stat hielten daz an dem brief verschriben stet, swelhen schaden wir oder vnser nachkomen dez n/amen, ez w/ar mit recht oder an recht, den s/ullen sy vns g/anczlich widerchern vnd abt/un an all widerred, vnd wenn auch dy vorgenanten zwen leib nicht mer ensind vnd von todes wegen abgegangen sind, so sind vns vnd vnserm obgenanten spital dy egenanten /akcher z/u durchslecht ledig vnd los worden, daz wir f/urbaz vnsern fr/um domit schaffen m/ugen wie wir wellen an all hindern/usse, daz in oder wer den brief von iren wegen ir lebtag inn hat vnd f/urpringt. Daz allez also st/at vnd vnczebrochen weleib, dez z/u vrch/und geben wir in den brief versigelten mit vnsers obgenanten spitals gemainem anhangendem insigel f/ur vns vnd vnser nachkomen. Dez sind zewgen vnd t/adinger: Vlrich Chuttawer, Chunr(ad) Chaufmann vnd Hans spitalschreiber. Daz ist geschehen nach Christi gep/urtt dre/wczehen h/undert jar vnd darnach in dem viervndnewnczigistem jar dez suntags nach vnser fra/wn tag z/u liechtmesse.