Ich Peter von Remag, chorherre ze sand Johanns ze Regens(purch), vergich vnd bechenn offenleichen mit dem brif allen :I den, di in ansehent oder h/ornt lesen, daz ich mein haws vnd hofstat, gelegen hie ze Regenspurch hinder sand Chassyan turn, hinden an dez Ernuelser haws, vnd waz darzu geh/ort, vnd geh/ort zu dem gotzhaws ze Alten chappell ze Regens(purch), dem man jarleichen davon ze zins gib sechs schilling der langen Regenspurger pfenning mit allen den ern vnd rechten, di ich daran gehabt han, vnd mit sambt dem brif, den ich dar/vber gehabt han, recht vnd redleichen ze durchslecht verchaufft vnd geben han, alz chawffs recht ist, dem erbern priester hern Fridreichen dem Slaykchen vmb ein sogetan gelt, dez er mich mit beraiten pfenning verricht vnd gewert hat, gar vnd gentzleichen on allen meinen schaden vnd gebresten. Vnd ich han auch in dez vorgenanten hawss vnd hofstat mit aller zugeh/orung vnd mit allen den ern, alz ich ez selb inn gehabt han, gewaltig getan vnd gesetzzt in nutzz vnd in gewir vnd verzeich auch mich dez zu durchslecht mit dem gagenb/urtigen brif, als verre daz ich noch anders yemant von meinen wegen darauf noch darnach dhain ansprach noch vodrung nicht mer haben noch gewynnen sol noch enmag, weder mit gaistleichem noch werltleichem rechten noch on recht noch in dhainerlay weis, alz ich im daz allez gehaizzen vnd gelobt han mit meinen trewn. Daz dem vorgenanten hern Fridreich dem Slaikchen oder wer den brif von seinen wegen vnd mit seinem willen inn hat vnd f/urbringt daz allez also st/at vnd vnzebrochen beleib, dar/uber zu einem vrch/und vnd zu einer best/atichait gib ich im den brif versigelten mit meinem insigel. Daz ist geschehen nach Cristi gepurtt dreutzehenhundert jar vnd in dem f/umfvndsibentzgisten jar an sand Ambrosius tag dez heiligen herren.